Confía na chegada ao Monbus Obradoiro dun pivote «que poida vir canto antes»
16 oct 2025 . Actualizado á 19:37 h.O mellor xeito de mellorar é analizar coa cabeza fría, sen facerse trampas ao solitario. Nese marco encádrase a reflexión de Epi ao diseccionar a sufrida vitoria conseguida por el Monbus Obradoiro no Amenabar Area, máis aló do efecto liberador e de que redunde positivamente na confianza.
O técnico viu melloría na porcentaxe de acerto no triplo, sen deixar de recoñecer que o rival tamén estivera a máis nivel nesa fronte que en actuacións precedentes. Gustoulle a lectura táctica do equipo en ataque para buscar as súas vantaxes, con momentos de máis e de menos acerto. E viu unha melloría no balance defensivo respecto á xornada anterior, aínda que advirte de que o cadro de persoal debe ir a máis no un contra un e en determinadas situacións de rebote.
Nunha análise máis de conxunto, observa a diferenza entre «a parte do que pode facer o xogador individualmente a nivel de esforzo, de coñecementos, e pártea táctica». «A ver se somos capaces xa de estar todos xuntos e poder manter equilibrios nos quintetos que nos poidan permitir ter unha solvencia defensiva e ter un rendemento ofensivo», engadiu.
Epi espera que o Obra siga dando pasos adiante o sábado fronte ao Melilla, un rival do que recea a pesar de que aínda non estreou a súa marcadora de vitorias. Advirte de que «o seu perímetro ten moito talento individual, moita capacidade para anotar, para mover o balón na pintura».
Chama a atención sobre «Poirier, que está a facer unha gran tempada. É o mellor da liga en porcentaxe de tres e a nivel de rebote ofensivo é o cuarto mellor da competición. Teñen moitas situacións que debemos controlar, tanto no perímetro, sobre todo dos seus manejadores, como de Poirier, que lles dá moita versatilidade, moitas situacións dun contra un que teremos que ser capaces de defender». Na pintura perderon a unha peza crave, Iván Cruz, pero xa dispoñen do recambio preparado para estrearse en Sar, o letón Stumbris.
Entre tanto, o Obradoiro tamén segue escudriñando o mercado en busca dunha substitución para Huskic. Epi confirmou que se vai acoutando o terreo: «Estamos a traballar en incorporar ao que pensamos que nos pode dar máis cousas, porque agora non é tan doado ir ao mercado. Pero Raúl (o presidente) transmitiunos máxima confianza no que poidamos incorporar, transmitiunos a calma e a posibilidade de incorporar o que queiramos dentro do que podemos. E bo, niso estamos».
Os prazos empezan a apertar: «Non me preocupa tanto atopar o xogador que eu quero, senón preocúpame atopar un xogador que poida vir canto antes, porque necesitamos incorporar a un» que eleve o nivel do equipo.