Aspanane busca fondos para un innovador fogar residencial para 50 persoas con discapacidade intelectual en Xove
XOVE
O proxecto redactado contará con unidades de convivencia para que as familias poidan vivir xuntas e a súa execución roldará os 7 millóns
18 mares 2024 . Actualizado ás 17:51 h.A historia de Rosario Vilasa Dacosta, veciña de Xove de 86 anos, viúva e con catro fillos con discapacidade intelectual ao seu cargo, é a punta do iceberg dunha realidade que afecta a decenas de familias mariñás que ven con impotencia como os seus fillos envellecen sen ter claro que será deles no futuro. A Asociación de Familiares de Persoas con Discapacidade Intelectual de Viveiro (Aspanane) busca financiamento para executar a construción dun innovador fogar residencial en Xove. O proxecto básico xa está redactado e unicamente faltan os fondos para comezar a facelo realidade, como explica a directora xerente do colectivo sen ánimo de lucro, Elena Santos Cociña.
A residencia levantarase nunha parcela cedida polo Concello de Xove nas inmediacións de Palmeiro, na parroquia da Rigueira. Moi ampla (ten case 6.400 metros cadrados) e asollada, nela Aspanane ten intención de construír unha residencia de 50 prazas que estará distribuída en unidades de convivencia coa meta de ofrecer unha saída a casos como o de Rosario, que demanda que os seus catro fillos permanezan xuntos na Mariña cando ela falte. O inmoble contará cunha planta semisótano, unha planta baixa, unha primeira e unha segunda. Nas dúas últimas vivirán os residentes, distribuídos en seis unidades de convivencia que disporán de cuartos dobres e individuais, sala, mini cociña con mesa de comedor e terraza. O orzamento rolda os 7 millóns.
Elena Santos Cociña, directora gerente de Aspanane: «A esperanza de vida da xente con discapacidade é cada vez maior e é esencial ter unha residencia»
A directora xerente de Aspanane, Elena Santos Cociña, é consciente de que o de fogar residencial de Aspanane é moi ambicioso. «Non queríamos unha residencia co típico pasillo con habitacións ós dous lados. O das unidades de convivencia é moi novidoso e ímolo pelexar porque estamos convencidos de que o noso proxecto é o futuro deles, dos nosos usuarios e das súas familias», comenta Santos, que resalta que na Mariña non existe ningún dispositivo residencial desta natureza. Un feito que implica que mariñáns con discapacidade intelectual acaben sendo trasladados a residencias da Coruña, Ourense ou Lugo, entre outros, cando se fan maiores e os seus coidadores habituais, xeralmente os seus pais, faltan. «A esperanza de vida da xente con discapacidade é cada vez maior e é esencial ter unha residencia deste tipo na Mariña. É unha necesidade imperiosa porque é moi triste separalos do seu entorno», resalta Santos, que iniciou os contactos con diferentes administracións para solicitar os ao redor de 7 millóns de euros que precisan.
Centro de día e ocupacional
Aspanane desenvolve un importante labor no centro de día e o centro ocupacional que ten en Celeiro , nos que ofrece un apoio moi extenso aos usuarios e ás súas familias.