Así serán as pensións medias na Mariña no 2026 tras a subida do 2,7%, concello a concello

A recta final do ano é un momento importante para os pensionistas, pendentes de cobrar a segunda paga extraordinaria e tamén de coñecer o dato da subida das prestacións que se aplicará a partir do 1 de xaneiro. A ministra de Inclusión, Seguridade Social e Migracións, Elma Saiz, avanzou que as de tipo contributivo —aquelas que requiren dun mínimo de anos cotizados— aumentarán un 2,7% de acordo co Índice de Prezos ao Consumo (IPC) medio interanual. Esta porcentaxe aínda non é definitivo, pero serve para facerse unha idea de canto cobrarán o curso que vén os mariñáns que perciben estes subsidios.

Para calcular este incremento poden tomarse como base as pensións medias que documenta o Instituto Galego de Estatística (IGE), aínda que o dato máis recente é o do 2024. A partir desta referencia, compróbase que a revalorización das pensións oscilará como media entre os 27 e os 43 euros dependendo do concello. E é que, loxicamente, ao tratarse dunha subida uniforme, os subsidios máis altos incrementaranse en maior medida, e os máis baixos nunha contía máis pequena.

No 2024 foi a primeira vez que na Mariña todos os concellos superaron a barreira dos 1.000 euros de pensión media. Á cola do grupo están os concellos de Lourenzá e Trabada. En ambos os concellos, a media non se elevará demasiado dese limiar —aquel mileurismo que naceu no 2005 para sintetizar a precariedade laboral de moitos traballadores—, posto que a previsión é que a subida se limite a 27 euros ao mes, ou a 378 euros ao ano —as prestacións cóbranse en 14 pagas—.

En Cervo, onde o peso da industria do aluminio eleva as pensións á maior media comarcal e un dos máis altos de Galicia, as prestacións subirán unha media de 43 euros, o que significa un incremento de 602 euros.

Ás diferenzas entre concellos hai que engadir as de xénero. En todos os termos municipais, elas cobran de media menos. A pensión media das mulleres non chega aos mil euros en Alfoz, Mondoñedo, Lourenzá, O Valadouro, O Vicedo, A Pontenova, Trabada e Ourol, sendo neste último concello a máis baixa (877,07 euros). Deste xeito, en ningún destes concellos superarase a pesar de a subida do 2,7% o listón dos 1.000 euros. En Ourol, o incremento será de 23,67 euros, para superar por pouco os 900.

---

---

---