O Concello de Viveiro restrinxe preventivamente o uso da auga da traída e pide que non se use para beber, cociñar ou lavar os dentes
VIVEIRO
Acaba de emitir un bando no que anuncia que será necesario pór en marcha a ETAP de Landrove a través dunha subministración alternativa
07 jun 2025 . Actualizado á 20:34 h.O Concello de Viveiro restrinxe preventivamente o uso da auga da traída e pide aos veciños que non a usen para beber, cociñar ou lavar os dentes. Nun bando publicado ao redor das dúas da tarde, o goberno local que encabeza Mariña Gueimunde sinala que a vertedura detectada o venres no río Landro, e que aínda continúa, obrigará a pór en marcha unha subministración alternativa que garanta a continuidade do servizo, co obxectivo de preservar a seguridade e a saúde dos veciños.
Por esa razón restrinxen de xeito preventivo o uso da auga do abastecemento municipa. «De xeito que esta non se utilizará para a inxesta (bebida ou preparación de alimentos), lavado de alimentos nin hixiene bucodental», sinalan. Si poderá usarse, en cambio, para hixiene persoal (lavado de mans e duchas) e usos domésticos de limpeza.
«O Concello continúa traballando, da man da concesionaria do servizo de abastecemento (Viaqua), a Consellería de Sanidade e Emerxencias, á espera dos resultados das analíticas realizadas. Manteremos informada á poboación», conclúe a rexedora no bando.