Exponse un novo trazado na zona de curvas de Arredoada
10 dic 2020 . Actualizado á 05:00 h.Continúa «avanzándose na redacción do proxecto» que mellorará o trazado de 34,5 quilómetros da LU-540, a estrada Viveiro-Cabreiros, coñecida a da Gañidoira porque atravesa esa serra. Pola súa orografía, complica unhas obras aínda sen data cuxo obxectivo é incrementar a seguridade do vial e, paralelamente, reducir o tempo necesario para entrar ou saír de Viveiro cara ás autovías máis próxima, a AG-64, que á súa vez enlaza coa A-8 e a A-6.
Do proxecto técnico ocúpase a empresa Enxeñería do Noroeste, que continúa cos traballos de campo de topografía e geotécnica, explican desde a Consellería de Infraestruturas e Mobilidade, promotora dunha renovación do vial entre os quilómetros 5 e 39,5. Segundo Infraestruturas, os traballos agora en marcha son «moi importantes porque os terceiros carrís necesitan ampliar a plataforma e poden esixir muros que son ou viables ou non, en función da topografía do terreo e das súas características».
Valoran, igualmente, cambiar o trazado entre os quilómetros 5 e 8, contados desde Viveiro, as curvas coñecidas como a Arredoada, porque só así sería posible construír o terceiro carril para facilitar o adiantamento na zona onde comeza a primeira subida cara a Gañidoira.
A principal ligazón de Viveiro co exterior
Enxeñería do Noroeste dispón dun ano para rematar o proxecto, contado desde o pasado xuño. A proposta de mellorar a LU-540 lanzouna o actual portavoz do PP de Viveiro na campaña das municipais do ano pasado e fíxoa súa o presidente da Xunta, Núñez Feijoo. Para eles e para os técnicos, A Gañidoira é «principal itinerario» de saída e entrada de Viveiro cara ao resto de Galicia e da península.
Infraestruturas estima que as obras custarían uns 2,6 millóns. A idea é rectificar o trazado das curvas para permitir circular por elas máis de 80 quilómetros por hora, así como crear oito novos carrís de adiantamento, cinco en dirección a Cabreiros e tres en dirección a Viveiro. Agora, nun tramo de 34 quilómetros, prohíbese adiantar en 25 quilómetros indo cara a Cabreiros e en 29 cara a en Viveiro.
