Alunizan de madrugada contra unha coñecida cafetería do centro de Ribadeo e danse á fuga

Unha coñecida cafetería do centro de Ribadeo foi obxecto na madrugada do sábado ao domingo dunha estraña aluaxe. Ao redor das dúas da mañá, un condutor encaixou un coche contra a cristaleira do establecemento, que está situado na rúa Rosalía de Castro e que a esa hora permanecía cerrrado. Distintas fontes indican que o condutor e os posibles ocupantes tiñan previsiblemente o ánimo de romper a lúa e perpetrar un roubo. Aínda que houbo importantes danos materiais, non lograron o seu obxectivo e o turismo deuse á fuga.

Alertada por un veciño da zona, ao lugar desprazouse de inmediato unha patrulla da Policía Local de Ribadeo, que comprobou que non se trataba dun accidente de tráfico ao uso. Por iso é polo que estea a investigar o ocorrido a Garda Civil. A Policía Xudicial da Benemérita tamén instruirá dilixencias. 

Aparece abandonado e co contacto forzado un turismo en Vilaselán, en Ribadeo

La Voz

Distintas fontes indican que na zona quedaron varios restos do vehículo que poderían facilitar a súa identificación. Ao redor das oito e media da mañá, o lugar permanecía acordoado. Tamén sinalan que o suceso é estraño posto que a citada cafetería ten diante unha terraza situada en altura, así como varios testos de considerable tamaño. 

Horas antes, na parroquia de Vilaselán fora abandonado, e co contacto forzado, tras unha saída de vía un turismo. Outro suceso estraño que está a ser investigado e que podería ter algún tipo de relación, ou non, co ocorrido de madrugada no centro urbano ribadense. 

---

---

---