Os accidentes na Gañidoira diminuíron drasticamente, o ano pasado non houbo ningún, ao haber menos cabalos e corzos debido aos lobos
15 mar 2022 . Actualizado á 18:12 h.Dúas persoas ilesas e catro cabalos mortos sobre a calzada foi o balance do accidente rexistrado este luns á primeira hora, minutos antes das oito da mañá, no alto da Gañidoira, na estrada LU-540, que enlaza Viveiro con Cabreiros. O sinistro chamou a atención pola súa virulencia, pero tamén porque hai tempo que no vial non se producen sinistros de gravidade con cabalos implicados, como recoñeceron distintas fontes oficiais. As mesmas fontes indican que a cabana equina na zona, que se estende polos municipios de Ourol e Muras, reduciuse considerablemente na última década como consecuencia dos ataques do lobo.
«Hai anos había cabalos case por todas partes: na calzada ou a uns metros, no arcén... E víanse crías, pero agora non se ve ningunha porque o que o que primeiro mata o lobo son as crías. Antes, moitas cruzaban xogando e os maiores, que estaban detrás comendo, ían detrás delas e por iso había bastantes accidentes», expón o responsable de Protección Civil de Ourol, José Ramón Seara Arís, quen apunta que o envellecemento da poboación no rural mariñán e chairego, así como o consecuente peche ou abandono de numerosas explotacións gandeiras tamén influíu no descenso do número de cabalos. «Súmase todo», reflexiona.
Protección Civil de Ourol indica que agora hai moitos accidentes con xabarís, posto que o lobo ha decimado tamén a cifra de corzos Seara Arís resalta que a baixada na cifra de reses é especialmente visible na zona máis alta de Ourol, na parroquia de Miñotos. «Antes víanse moitos cabalos e agora case ningún. E se non se ven é porque non os hai», sinala, e lembra que en tempos a Administración pensara en valar a estrada LU-540 co obxectivo de evitar accidentes impedindo a entrada de cabalos á calzada. Con todo, a medida nunca chegou a callar e a acción do lobo parece facela innecesaria agora que esa sinistralidade baixou.
José Ramón Seara Arís, responsable de Protección Civil de Ourol: «Só en Ourol antes había media ducia de accidentes con cabalos ou ano; non 2021 non houbo ningún»
Nos 24 anos que leva en Protección Civil de Ourol, José Ramón Seara Arís leva asistido a numerosos accidentes na LU-540 con cabalos, aínda que duns anos a esta parte, este tipo de sinistralidade baixou moito. «Só en Ourol antes había unha media de media ducia de accidentes con cabalos ó ano; no 2021 non houbo ningún», comenta, antes de lembrar algúns. «A un quilómetro do casco de Ourol recordo o dunha traballadora que levaba un bebé e matara catro. Un pouco máis arriba, en Mosende, un todoterreo tamén matara catro, e houbera outro moi grave ó que eu non fun, pero no que un rapaz de Viveiro quedara ferido de moita gravidade», comenta.