Arrinca a tempada grande de peregrinos»: «Cada vez veñen máis estranxeiros, ata de Corea do Sur», di Ángeles Montero

«Bastante reservas, son boas», sinala Ángeles Montero ante unha das principais tempadas ao ano na que as boas temperaturas parecen que animan máis a peregrinar, aínda que é un hábito perfectamente practicable 24/7/365. É xerente do primeiro albergue privado que abriu no Camiño Norte, en 2016, como continuación de aloxamento ao hotel do mesmo nome e funcionando desde os 70. Ademais, o establecemento está involucrado na iniciativa de marca que se presentou hai pouco máis dun mes, en abril, baixo o nome «De catedral a catedral» que conta co apoio de comercio, hostalería, restauración e institucións locais e autonómicas, tamén das dioceses tanto de Ferrol como de Santiago. O principal obxectivo é potenciar o Camiño Norte no tramo comprendido entre Mondoñedo, lugar de partida, e Compostela, lugar de destino. «Estamos xusto removendo a iniciativa para dala dalgunha forma dar a coñecer, promocionando un libro de bitácora firmado polo obispo, a nosa propia mascota e a credencial especial, ainda que hai xa xente que o ano pasado empezaba o Camiño en Mondoñedo», indica Ángeles Montero.

Indica que recibe un volume importante de peregrinos estranxeiros: «Dentro destes, vén moito alemán, americano, francés, irlandés, inglés... A todos lles encanta o Camiño Norte». A semana pasada chegoulle un de Corea do Sur. «É unha ruta xacobea dura pero é moi bonito. Ten máis fama o Francés, porque é mais sinxelo de percorrer e é o que primeiro que fai case todo o mundo», engade. «O Camiño Norte _continúa Montero_ é duro pola orografía, porque ten moita montaña. Pero ten encanto. Necesita potenciación por parte da Xunta e do Xacobeo para impulsalo, fronte ao Francés e Portugués que están masificados. Sen embargo, no Norte o peregrino nota que hai menos xente facéndoo que nos outros». Para quen busque menos bulicio é ideal, pero tamén é necesario que se coñeza e trace máis, recoñece ela. Fano persoas en solitario, en parella ou en grupos, en bicicleta ou andando principalmente. Destaca tamén que entre os estranxeiros peregrina bastante xente maior, de 70 e incluso 80 anos.

 Aínda que quedan aínda meses por diante, desde o Albergue Montero cre que este vai ser un «bo ano, se por parte da Xunta se potencia o Camiño Norte» e coa esperanza do éxito da iniciativa «De catedral a catedral» que levará este domingo 11 un mes de funcionamento. O pasado mércores había aloxadas 12 persoas no albergue e 7 en cuartos dobres no hotel. «Estamos tendo unha ocupación moi boa este ano», conclúe.

---

---

---