O Celtas Rabaza afronta un duelo de invictos contra o Costa Ártabra tras o debut como local do Galicia Praia ante Escravas
18 oct 2025 . Actualizado á 05:00 h.Os afeccionados ao baloncesto na comarca da Mariña vivirán hoxe unha intensa xornada de sábado. O Pavillón Torques de Marzán vibrará nunha intensa dobre sesión co debut como local do cadro feminino do Celtas Galicia Praia de Foz fronte ao Escravas coruñés, seguido dun encontro de altos voos entre os invictos na Primeira Autonómica masculina Celtas Rabaza e Costa Ártabra. Ademais, o novo proxecto sénior masculino do CB Burela estréase en Meira.
Celtas Galicia Praia
O equipo de Foz recibe ao Escravas da Coruña na segunda xornada da Primeira Autonómica feminina e o primeiro partido na súa cancha (Marzán, 16 horas). Tras caer por 75-58 en Vilagarcía, o Celtas atopará a un rival que vén de derrotar ao Compaña de María por 86-51. Presuponse outro difícil exame ante un potente inimigo para as xogadoras de Alberto Ruiz de Galarreta, que tratarán de arrincar o triunfo co respaldo da súa inchada.
Celtas Rabaza
Aínda máis, se cabe, promete o choque da Primeira Autonómica masculina entre o Celtas Rabaza de Foz e o Costa Ártabra (Marzán, 18 horas). Os mariñáns callaron un inicio de curso espectacular con vitorias ante o Cambre (100-90) e o USC Obradoiro (80-82) e enfrontaranse a un equipo que xa derrotou ao Kempape (62-70) e ao Basket Ferrol (79-46). Un deles perderá esta tarde a súa condición de invicto nun pavillón de Marzán que agarda sexa un fervedoiro de afeccionados ansiosos por levantar ao seu equipo ao terceiro triunfo.
CB Burela
Tras varios anos sen equipo sénior masculino de baloncesto federado e o adiamento da súa primeira xornada, o CB Burela reaparece hoxe por fin na Terceira Autonómica masculina visitando ao Naturleite Vila de Meira (Municipal de Meira, 20 horas).
Os pupilos de Manolo Cobas afrontarán un duelo de rivalidade provincial ante un conxunto que caeu por 89-63 contra o CB Kempape Negro no partido inaugural. Sen ningún encontro previo de rodaxe na pretemporada, os mariñáns teñen un duro test no arranque oficial da competición para eles.