O acusado de arrincarlle o dedo dunha dentada a un mozo de Foz: «Sacoume un coitelo e tiroume ao chan, eu só me defendín»

A Fiscalía de Mondoñedo solicita unha pena de cinco anos de prisión para un veciño de Foz acusado de causar lesións graves a outro home durante unha pelexa ocorrida na madrugada do 13 de agosto do 2022, ás portas do restaurante A Soalta, nas inmediacións dunha discoteca. O xuízo celebrouse este martes na Audiencia Provincial de Lugo e o procesado, que se enfronta a unha importante pena de prisión debido aos seus antecedentes, xustificouse alegando defensa propia.

Segundo o relato do Ministerio Público, o acusado atopouse na vía pública co prexudicado, con quen xa existían «desavinzas previas». Ambos se encerellaron ata en tres ocasións, sendo separados nas dúas primeiras por amigos. Durante o terceiro enfrontamento, o acusado mordeu o dedo índice da man esquerda do denunciante con tal violencia que lle arrincou a primeira falanxe, actuando —segundo sostén a fiscal— «coa intención de danar gravemente a súa integridade física».

Como consecuencia da agresión, o prexudicado sufriu un traumatismo cranial sen perda de coñecemento e a amputación parcial do dedo, o que requiriu intervención cirúrxica para confeccionar un toco, así como tratamento médico a base de analxésicos, antibióticos e curas.

O acusado xa fora condenado anteriormente por delitos de lesións, polo que a Fiscalía solicita que se aplique a agravante de reincidencia. Unha das condenas, de cinco meses de prisión, estaba pendente de cumprimento no momento dos feitos. Ademais da pena privativa de liberdade, a Fiscalía solicita que o acusado indemnice ao prexudicado con 8.000 euros polas lesións sufridas, e ao Sergas con 1.244,95 euros polo custo da atención médica prestada.

«Cando vin que levou a man ao coitelo, mordinlle a man. Fíxeno para defenderme»

Na vista do xuízo, o procesado defendeu a súa inocencia. Non negou morder ao outro mozo, pero si que iniciase el o conflito. «Atopámonos varias veces esa noite. El achegóulleme e ensinoume o coitelo. Á terceira vez que nos vimos, fóra da discoteca, veu facía min, púxome a man na cara e tiroume o chan. Cando vin que levou a man ao coitelo, mordinlle a man. Fíxeno para defenderme. Só me defendín —insistiu—. Entón separáronnos uns amigos e el foise», xustificouse. 

Alegou que non soubo que o afectado perdera o dedo ata tempo despois. «Alí ninguén decatouse, porque ninguén dixo nada», indicou. Engadiu, ademais, que estaba bebido e que non foi consciente no momento do que pasara exactamente. Finalmente, lembrou que o denunciante tivera unha orde de afastamento del. «Atacárame máis veces, tiñamos moi mala relación», concluíu. 

A vítima, que tamén interveu no xuízo como testemuña, deu unha versión contraria, dicindo que estaba só e que foi o acusado o que lle atacou en primeiro lugar cando saía do restaurante onde traballaba para botar o lixo. Segundo declarou, recibiu patadas na cabeza que o deixaron «mareado» e foi suxeitado polos familiares do acusado.

---

---

---