Un usuario pregúntase «como pode pasar isto en pleno século XXI», mentres o Sergas asegura que se programa a actividade e as datas ofrecidas aos pacientes non son definitivas
22 ago 2025 . Actualizado á 12:12 h.Un usuario do centro de saúde de Cervo denunciou este xoves, 21 de agosto, que, tras solicitar cita telefónica co médico de familia para renovar medicación desactivada, déuselle vez para o 1 de outubro.
Este paciente, que tramitou unha reclamación a través do departamento de atención ao usuario do Sergas, pregúntase «como pode pasar isto en pleno século XXI» e sinala que o xoves, ao acudir ao ambulatorio cervense, había polo menos dous veciños máis coa súa mesma problemática. Neste sentido, admite que a súa patoloxía non é grave, pero advirte das consecuencias que poden ter este tipo de atrasos en persoas que teñen doenzas de maior gravidade.
Nos centros de saúde de Cervo e San Cibrao hai desde xullo un único facultativo, o que suscitou críticas e unha concentración para reclamar máis médicos para unha poboación, a municipal, que supera os 4.000 habitantes e que aumenta durante a época estival co turismo.
Consultadas sobre a alternativa que ofrece o Sergas a estes pacientes, fontes da Consellería de Sanidade aseguran que «estase programando a actividade para setembro no centro de saúde de Cervo en función dos días nos que se poida dispoñer de médico, e polo tanto as citas non son definitivas, abriranse as axendas e reprogramaranse. Facemos un grande esforzo para cubrir as ausencias pese a que hai cero profesionais nas listas de contratación, e a atención sanitaria urxente está garantida», alegan.