Negado nas dúas áreas, caeu con estrépito e ten ao Noia a dous puntos
03 may 2025 . Actualizado á 22:04 h.A peor derrota no peor momento. O Burela sufriu un serio correctivo no feudo do ATP Iluminación Tudelano Ribeira Navarra, un rival directo que deixou a súa permanencia practicamente resolta, e incluso pode rematar a antepenúltima xornada de Primeira División nos postos de descenso, ao conservar só dous puntos de renda sobre un Noia Portus Apostoli que visita ao Barcelona este domingo. Os pupilos de David Rial terán que pelexar o seu obxectivo fronte aos poderosos Elpozo Murcia, no Vista Alegre, e Jimbee Cartaxena, a domicilio.
O seu desacerto nas dúas áreas fixo imposible que os pupilos de David Rial competisen, a pesar de sobreporse a un forte inicio dun Tudelano impulsado por un ambiente de gala. Trípodi mandou fose a primeira ocasión tras un roubo ao 17 segundo e Kaluza realizou varias paradas antes de que un Malaguti nervioso ao comezo e decisivo logo desperdiciase unha opción flagrante.
Charly mandou alto no segundo pau un saque de banda rápido de Alberto Mirás antes de que David aproveitase un gran servizo de Terry para asinar o 1-0. Envorcado no tramo final da primeira metade, o Burela topouse cun inspirado Raúl Jiménez en intentos de Alberto Mirás e Pitero.
57 segundos abondaron para presentar unha desgraciada segunda parte para os laranxas cun tanto de Albertico tras un erro de Kaluza na saída de pelota. Unha chegada a liña de fondo do mesmo xogador provocou o gol en propia de Charly e que os mariñáns puxesen a Araya de porteiro-xogador con máis de 12 minutos por diante.
Con xogo de cinco ameazou pronto o chileno e Charly estrelou un punterazo na cepa do poste, pero Malaguti e Terry disiparon calquera esperanza de envorco no marcador. Un bo contragolpe culminado por Albertico e un saque de esquina que rematou Terry confirmaron o día aciago dun Burela que tamén se fartou de desperdiciar ocasións para marcar. Eric Pérez salvou de milagre sobre a liña de gol o rebote a un tiro de Kaluza, entre Raúl Jiménez e o poste frustraron un dobre penalti de Juninho e Pitero xutou outro desviado.
ATP ILUMINACIÓN TUDELANO RIBEIRA NAVARRA FAS, 7: Raúl Jiménez; Albertico, Trípodi, Sepe e Terry —cinco de inicio—, e João Batista, Haby Vasques, David, Malaguti, Eric Pérez e Adrián Pereira.
BURELA FS, 0: Kaluza; Araya, Alberto Mirás, Rikelme e Isma —quinteto titular—, e Pitero, Charly, Quelle, Campàs e Juninho.
GOLES: 1-0, min 14: David. 2-0, min 21: Albertico. 3-0, min 27: Charly, en propia porta. 4-0, min 31: Malaguti. 5-0, min 32: Terry. 6-0, min 34: Albertico. 7-0, min 37: Terry.
ÁRBITROS: Pablo Delgado (Valencia) e Alejandro Martínez (Murcia). Dobre amarela a Sepe (min 40). Tamén amoestaron a Malaguti, Terry, Albertico, Sepe, David Rial, Araya e Isma.
INCIDENCIAS: Ambientazo no Ciudad de Tudela.