O podólogo burelense que viaxou a Moscova en plenas eleccións -que gañou Putin- e en guerra con Ucraína, «e todo ok»
BURELA
Miguel Murias impartiu un curso sobre a súa especialidade na capital rusa, xunto ao asturiano Raúl Martínez e ao arousán Patricio Serqueira; é o podólogo ademais do Burela FS
27 mares 2024 . Actualizado ás 14:00 h.Tras a guerra aberta con Ucraína é practicamente imposible viaxar de xeito directo a Rusia. Isto sucedeulle a Miguel Murias, un podólogo de Burela que viaxou a Moscova a pasada semana, onde estivo seis días, xunto ao asturiano Raúl Martínez e ao arousán Patricio Serqueira, para impartir un curso sobre podoloxía e cirurxías de pé.
Este curso xa o impartisen anteriormente no ano 2017 e no ano 2018. Neste curso participaron xente de Lituania, Bielorrusia, Tadxiquistán e moitas zonas de Rusia. Impartíano en castelán e usábanse tradutores consecutivos.
Os tres homes saíron na ida desde Avilés destino Londres, de alí viaxaron a Istambul para recalar en Moscova. E na volta saíron cara a Armenia, e desde alí voaron a Roma para regresar a Avilés.
«Contactáronnos outros anos pero coa pandemia e a guerra non era cuestión viaxar cara alá. Agora explicáronnos que todo estaba moito máis tranquilo, que había moita seguridade, entón decidimos ir», explica o podólogo Miguel Murias, xa en Burela, de regreso de Moscova.
Durante a estancia na capital rusa, para os tres foi unha viaxe totalmente normal, coma se estivesen nunha cidade española como Madrid ou Barcelona, sen ver nada fóra do normal. « A xente segue pola rúa tan tranquila, non se fala da guerra nin ves militares pola rúa. Coincidimos coas eleccións de Rusia pero non vimos nada raro en canto á seguridade nin nada excesivo no aeroporto», engade Murias. Todo normal, todo ok.
Aumento de lesións no deporte
Ademais de ser podólogo na súa Clínica, tamén o é no Burela FS Pescados Rubén, onde xa leva 16 tempadas. Para el, o aumento de lesións no deporte débense a unha serie de factores como son: a excesiva carga de partidos e de adestramentos; que cada vez se está empezando a competir en idades máis temperás e que agora prima moito o aspecto físico con respecto á técnica.
«Agora mesmo hai moitos nenos de sete, oito ou nove anos que veñen á miña consulta con dores de pé ou musculares. Antes iso na miña xeración era impensable ir a un fisioterapeuta con esta idade. É un problema serio que habería que revisar pero creo que non ten solución», conclúe o podólogo Miguel Murias