Madrugada de fortes ventos na Mariña, con refachos de 114 quilómetros por hora en Viveiro e 105 en Burela
A MARIÑA
Un dos primeiros temporais do outono deixou choivas débiles na noite do sábado ao domingo
19 oct 2025 . Actualizado á 09:12 h.A Mariña, especialmente na zona occidental e central, viviu unha madrugada de fortes ventos, con refachos que en distintos puntos superaron os cen quilómetros por hora. Segundo datos dos boletíns de observación de Meteogalicia, na estación meteorolóxica de Penedo do Galo, situada en Viveiro a 545 metros de altitude sobre o nivel do mar, á hora de escribir estas liñas, o refacho máis forte rexistrárase ás 06.10 horas. Acadou os 113,9 quilómetros por hora.
Na estación de Burela, emprazada a 421 metros de altura, media hora despois, ás 06.40 horas, o vento acadou os 104,7 quilómetros por hora.
Un dos primeiros temporais do outono, que deixou choivas débiles en diferentes lugares na noite do sábado ao domingo, trouxo ventos de 82,5 quilómetros por hora a Foz, onde a estación se sitúa a 73 metros de altura; de 65 quilómetros hora a Ribadeo ou de 50,3 a Mondoñedo, segundo datos recompilados polos sensores de Meteogalicia.
Con todo, na comarca mariñá as temperaturas son altas para a época do ano, con valores que a pasada madrugada oscilaron entre os 15,4° que mediu Penedo do Galo e os 23,4° que marcou a estación ribadense de Pedro Murias ás 07.20 horas, que de novo volveu fixar a temperatura máis alta de Galicia.