Bombeiros de Viveiro e de Barreiros tamén están a pelexar para controlar o grande incendio da Ribeira Sacra
A MARIÑA
Arrasa Pantón, saltou o río Cabe cara a Sober e van queimadas 1.400 hectáreas; aos bombeiros de Viveiro sumáronse os de Vilalba
20 sep 2025 . Actualizado á 20:36 h.Bombeiros de Viveiro e de Barreiros tamén se desprazaron para axudar a controlar o grande incendio que está a arrasar a Ribeira Sacra. A eles únense os de Vilalba. As chamas arrasaron Pantón, saltaron onte á noite o río Cabe cara ao municipio de Sober; van queimadas 1.400 hectáreas. A todos os efectivos desprazados, incluída a UME do Exército, uníronse bombeiros do parque de Viveiro e de Barreiros.
O incendio forestal que empezou o xoves no canón do Sil foise complicando co paso das horas e os días pola calor e o lume avanza cara a Sober. A última hora de onte, o incendio saltaba o Cabe, prendía na marxe esquerda, pertencente ao municipio de Sober, e subía con forza ladeira arriba. Ás oito da tarde foran desaloxadas cinco aldeas, tres en Pantón e dúas en Sober. O tempo non axuda.
Precisamente a pasada fin de semana outro incendio arrasaba montes de Barreiros, na Mariña lucense, onde ademais resultaron feridos 5 brigadistas da unidade helitransportada de Abegondo, na Coruña, cinco mozos de 24 a 29 anos que aínda están no hospital con prognóstico grave por queimaduras.