Noite de celebración e alegría na Mariña, con centenares de persoas na gran fogueira da praia de Covas-Viveiro

A de San Xoán foi unha noite de celebración en toda A Mariña, en especial en Covas-Viveiro con centenares de persoas congregadas na praia para ver a gran fogueira que como é tradición, acendeuse a medianoite no descanso da verbena que amenizaron Os Españois e Os Satélites. A temperatura, suave, agradable, animou a que centos de persoas achegásense a ver a gran fogueira na praia urbana no paseo marítimo de Covas.

Este ano ademais están xa en Viveiro os fans do Resu que nalgúns casos tamén se sumaron; unha das zonas gratuítas de acampada está precisamente no parque Pernas Peón de Covas. Houbo un grande ambiente non só en Covas, en toda a comarca mariñá con centenares de fogueiras acesas xa desde a tarde.

Foi unha noite e unha madrugada de moitas incidencias en toda a comunidade galega, como era previsible. No 112 Galicia, o servizo de emerxencias, informan que rexistraron un total de 1.195 chamadas entre as 20:00 horas de onte e as 7:00 horas do día de hoxe de toda Galicia. Estas chamadas traducíronse en 451 incidencias, coas asistencias sanitarias como intervención máis repetida ao longo da noite, con case 200. Tamén foron reiterativos os requirimentos das forzas da orde, xa sexa por pelexas (52) ou por xente agresiva (26). Contabilizáronse ata 10 incendios urbanos, así como ata 33 incendios doutros tipos. Así mesmo, a cidade desde a que se reportaron maior número de incidencias foi A Coruña, con máis de 50, seguida de Vigo, con 44. Dentro das incidencias que se xestionaron ao longo desta noite, fai falta mencionar que varias persoas tiveron que ser atendidas por queimaduras en fogueiras en Mos, Soutomaior, Vigo e Marín, o que requiriu a intervención do persoal sanitario.

---

---

---