Acúsanlle de estafar a tres particulares máis de 10.000 euros nun só mes coa falsa compra de coches

Un home afronta unha pena de tres anos de prisión, así como indemnizacións por máis de 10.000 euros para os catro presuntos prexudicados, como suposto autor dun delito continuado de estafa. O xuízo polo caso, procedente do Xulgado 2 de Mondoñedo, celebrarase o venres na Sala do Penal 1 de Lugo.

Segundo a Fiscalía, o acusado, «obrando con ánimo de ilícito enriquecemento», dedicouse durante os primeiros meses do ano 2022 á compra de vehículos a particulares, «sendo o seu propósito apropiarse deles e non abonar o prezo de venda acordado» cos vendedores. «A súa forma de actuar era sempre a mesma: pactaba unha cantidade e incluso formalizaba un contrato, e mostraba posteriormente á outra parte un resgardo dunha suposta transferencia polo importe pactado, retendo o procesado baixo o seu dominio os turismos adquiridos, e non desembolsando por eles» un euro, argumenta o Ministerio Fiscal, que reclama tamén as costas.

Un dos prexudicados puxo á venda o redes sociais o 4 de marzo do 2022 un turismo polo que chegou a un acordo co acusado, cun prezo de venda de 5.200 euros. O procesado «envioulle unha foto dun xustificante de transferencia bancaria, entregando o vendedor o coche ao comprador. Cando acudiu ao banco comprobou que non recibira diñeiro», afirma a Fiscalía.

Dezaseis días despois, sempre segundo o relato do Ministerio Fiscal, caeu na estafa, co mesmo modus operandi, outro vendedor, pactándose como prezo do turismo 2.500 euros. Neste caso, o acusado vendeu o coche a un terceiro por 350 euros, pero «como queira que o procesado non efectuou o cambio de titularidade, o comprador non dispón de documentación e non pode usar o vehículo adquirido».

No terceiro caso, o acusado citouse coa presunta vítima en Barreiros e ambos pactaron a venda dun coche por 2.500 euros. Formalizaron o contrato nunha xestoría focense pero o comprador achegou unha falso xustificante para acabar non pagando nada.

---

---

---