O analista do Vilarreal volverá traballar con Unai Emery na Premier League
23 may 2023 . Actualizado á 11:55 h.Pablo Jesús Rodríguez Méndez (Viveiro, 1975) múdase ao Reino Unido para vivir a Premier League desde dentro. O bo traballo do mítico exfutbolista do Racing de Ferrol como analista no Vilarreal non pasa desapercibido e a próxima tempada reforzará o corpo técnico do Aston Villa.
No club de Birmingham, Pablo Rodríguez volverá poñerse ao servizo de Unai Emery, co que compartiu vestiario como xogador na Malata e vivencias no banco do Vilarreal. No club groguet conquistaron o pasado curso a liga Europa. Antes pasou sete anos no Valencia, onde tamén gañou unha Copa do Rey.
Emery asumiu o mando do Aston Villa o pasado novembro nunha complicada situación clasificatoria que logrou reverter. A unha xornada da conclusión do campionato ligueiro, o seu equipo é sétimo, nunha praza que lle permitiría disputar a próxima edición da Conference League. Entón Rodríguez decidiu quedarse no Vilarreal, no que traballou con Quique Setién.
Ademais do viveirense, ao corpo técnico do Aston Villa súmase «de forma inmediata» Alberto Benito, desde o Betis. Previamente traballou con Emery no París Saint-Germain e no Arsenal.