A Xunta buscará unha «fronte común» con Asturias e Cantabria en defensa das electrointensivas como Alcoa
A MariÑA
O presidente do Goberno autonómico, Alberto Núñez Feijoo, comprometeuse este luns en San Cibrao a contactar con Adrián Barbón e Miguel Ángel Revilla para falar co Goberno central
17 feb 2020 . Actualizado ás 18:57 h.O presidente da Xunta, Alberto Núñez Feijoo, comprometeuse este luns en San Cibrao (Cervo) a buscar unha «fronte común» con Asturias e Cantabria en defensa das empresas electrointensivas das tres comunidades, como Alcoa SanCibrao . Ao seu xuízo, estas son as compañas para as que «supón unha acta de defunción» o borrador do estatuto para a industria electrointensiva presentado días atrás polo Goberno central; un documento que, na súa opinión, beneficia a empresas de Cataluña e do País Vasco en detrimento de galegas, asturianas e cántabras posto que rebaixa máis o prezo da enerxía eléctrica ás empresas que menos consumen, mentres que llo rebaixa menos ás que máis consome.
«Paréceme unha medida razonable e ímonos poñer en contacto co presidente de Asturias e co de Cantabria porque nos parece razonable, do mesmo xeito que creo que os secretarios xerais a nivel nacional de CC.OO. e UXT, e o máximo representante da CIG, deberíamos falar co Goberno [central] e dicirlle que ese non é o camiño, que pechar as industrias que producen aluminio primario é un erro que non nos podemos permitir», manifestou o titular da Xunta ao termo de a reunión que mantivo na Casa do Mar de San Cibrao con representantes do comité de empresa da factoría aluminera, así como o conselleiro de Economía e Industria, Francisco Conde; e os alcaldes de Cervo, Alfonso Villares , e Xove, Demetrio Salgueiro.
Xunta, comité e sindicados, de acordo nas alegacións presentadas
José Antonio Zan (CC.OO), presidente do comité, cualificou de «barbaridade industrial» o texto do estatuto. «Hai que darse conta que están a pór en perigo só na Mariña a máis de 8.000 familias», manifestou. Xunta e comité coincidiron en que o Goberno central debe aceptar as alegacións presentadas, que en resumo consisten en «pór a compensación do CO2 ao máximo permitido pola Unión Europea, igual que fan o resto de países», e en abaratar o prezo do megawatt por baixo dos 40 euros. «Se isto segue así, Alcoa non ten futuro. Queremos que antes de febreiro se peche un texto para garantir o futuro de Alcoa, e iso pasa por aceptar as alegacións presentadas conformes a dereito, conformes á normativa europea e conformes a Competencia que a Xunta de Galicia traslada e que están consensuadas co comité de empresa e as organizacións sindicais», concluíu Feijoo.
O presidente da Xunta instou o Goberno central a «deixar sen efecto» o texto actual do borrador do estatuto para «aceptar» as alegacións que, segundo apuntou, presentaranse o día 20. «E este mes, o día 29, chegar cun texto consensuado» entre traballadores e administracións públicas que «non supón máis coste e sí maior tranquilidade para as familias», concluíu.
