Partido crucial polo título de Primeira entre os equipos que se reparten os seis últimos: Burela e Atlético de Madrid
03 mares 2018 . Actualizado ás 05:00 h.Partido de decibeis. Dos de verdade. Outra batalla co título no horizonte entre os dous equipos que desde fai uns cantos anos monopolizan a Primeira División feminina de fútbol sala ?a liga non coñece outro campión desde a campaña 2011-2012?. O Peixes Rubén -Burela e o Atlético de Madrid reeditan esta tarde (18.00 horas, Vista Alegre. TVG2) un enfrontamento sempre cargado de emoción, interese e importancia nunha carreira polo título á que quedarán só once etapas despois desta décimo novena xornada.
O conxunto colchoneiro desembarca no santuario burelista sen ausencias e cunha lixeira vantaxe numérica sobre o seu adversario. O líder branquivermello suma dous puntos máis que un Peixes Rubén-Burela que tamén poderá despregar a todas as súas estrelas sobre o parqué do Vista Alegre para un combate no que Julio Delgado, o técnico local, non contempla o k.ou do seu equipo despois de ver a súa actitude nos días previos. «Sempre adestran moi ben, pero esta semana fixérono mellor aínda. Vexo ás xogadoras moi mentalizadas do que se xogan», destacou. Ten claro o estratego burelista que será un partido «de calidade», con infinidade de condicionantes e «tremendamente importante» na pelexa polo título. A pesar de que o seu equipo expón máis que o Atlético ?«unha derrota relegaríanos bastante», di?, entre as súas preocupacións non están os nervios, posto que «temos xogadoras con experiencia que saberán amornar ás demais», razoa.
Cilene é un desas futbolistas con galóns ás que se refire o preparador burelista. A peche brasileira advirte ao Atlético de que se atopará un Burela «moi forte» e destaca a importancia do ambiente nas bancadas. «A nosa afección será unha xogadora máis. Estará aí dándonos forzas en todo momento», declarou a pichichi laranxa.
A un gol dos 100
O primeiro tanto da tarde no Vista Alegre será o número 100 nos enfrontamentos ligueiros entre estes dous equipos. Nos 17 anteriores o Atlético marcou 54 e o Burela 45.