Anna Wintour elixiu a Chloe Malle como sucesora á fronte «Vogue» despois de 37 anos. Ela ten 39 e un pasado de cine: é filla da actriz Candice Bergen, que fixo de Wintour en «Sexo en Nova York» e do director Louis Malle
10 sep 2025 . Actualizado á 05:00 h.No ano 2008, coa febre e a nostalxia do fin da serie Sexo en Nova York, lanzaban a versión da película que todo o mundo desexaba. Carrie ía casar por fin co seu grande amor Mr. Big, pero a súa idea era facelo no concello cun sinxelo dúas pezas vintage. Todo cambiou cando a editora de Vogue convencíaa para converterse na protagonista dunha súpers reportaxe de noiva. A idea: a solteira de ouro de Nova York casaba. A que interpretaba na gran pantalla a Anna Wintour era a actriz Candice Bergen. Casualidades ou non, a ficción case se transforma en realidade: Bergen non é a herdeira do trono que deixou Wintour o pasado mes de xuño, pero si o é a súa filla, Chloe Malle. Todo un xiro dos acontecementos que marcou o inicio de setembro, a tempada máis potente para a moda e o mes máis simbólico para a revista.
Wintour estivo a cargo da edición americana da revista 37 anos. Para lembrar o seu estilo implacable queda o documental The September Issue, unha película perfecta para entender a forma de traballar de Wintour e o seu poder na moda: nunha das escenas máis memorables do documental, a xefa de Vogue pídelle uns cambios nos deseños a Óscar da Renda antes de que este lanzase a súa colección. Agora a tempada de setembro empeza cun novo nome que hai que ter no radar: Chloe Malle.
A nova editora da versión americana da revista de moda máis influente do mundo ten a súa propia historia. Esta neppo baby das letras creceu nun ambiente de cine e arte: a súa nai, a actriz Candice Bergen, tívoa co cineasta francés Louis Malle. Como Wintour, as súas raíces son europeas: Malle ten dobre nacionalidade, estadounidense e francesa. Naceu en Nova York, aínda que pronto se mudou a Los Ángeles para poder seguir a carreira da súa nai en Hollywood. Perdeu ao seu pai con 11 anos e sempre estivo moi vinculada as súas raíces familiares francesas a través dunha casa en Cahors, no sur de Francia, na que pasaba os seus veráns e na que, anos máis tarde, casou co seu marido Graham McGrath Albert. De feito, esa chiscadela á metade das súas raíces pode verse no seu perfil de Instagram onde acompaña o seu nome dun emoticono dun croissant.
Creceu rodeada dos premios dos seus pais: dous Globos de Oro e cinco premios Emmy da súa nai e un Óscar e varios Bafta, entre outros galardóns, do seu pai. Formouse en letras e empezou traballando como xornalista. Estudou literatura e escritura na universidade de Brown e viviu durante un ano de intercambio en París, onde estudou na universidade da Sorbona. Empezou a traballar facendo prácticas en The New York Observer. Tamén colaborou con The New York Times ata que no 2011 empezou a traballar en Vogue como editora de temas sociais. No 2023 foi nomeada editora de Vogue.com e durante estes anos destacou por ser un referente na edición dixital da revista e por ser era unha das copresentadoras do podcast The Run-Through. Ten dous fillos e no seu Instagram móstrase riseiro e natural, unha imaxe moi distinta á que transmitía a súa antecesora.
Nunha entrevista contou que cando se presentou ao posto para Vogue non tiña grande interese na moda, unha escena que lembra moito ao momento no que Anne Hathaway, unha xornalista buscando prácticas, preséntase ante Meryl Streep, a suposta editora da revista Vogue na ficción, nO diaño viste de Prada. Ten 39 anos (en novembro cumprirá os 40) e os seus compañeiros defínena como unha persoa alegre e perspicaz. Dela, a súa antecesora, Wintour, dixo: «É unha xornalista voraz e comprometida, cunha intuición para os intereses actuais das mulleres, e o seu ollo para a imaxe definitiva é excepcional».