SE O VERÁN foi o momento de levar os panos axustados ao pantalón por amais da cadeira, este outono volverase a un xesto que marcou a época dos noventa: a camisa atada á cintura, pero non de calquera modo. O detalle marca a diferenza
09 sep 2025 . Actualizado á 14:27 h.En Galicia crecemos saíndo de casa sempre cunha chaqueta ou ouna suadoiro na man. Levala ás festas pola tarde-noite era case obrigatorio. A mellor forma de que non ocupase moito espazo nin privase de liberdade cargando con ela na man era atarlla á cintura. Este xesto tan sinxelo, pero sobre todo práctico para gozar sen ataduras marcou toda unha época: a dos anos noventa.
Con Kate Moss como supermusa e o grunge como gran tendencia estética, o outfit of the day do momento consistía nuns vaqueiros rectos de tiro alto, unha camiseta básica de tirantes e unha camisa de cadros oversize atada á cadeira. Inspirada nesa imaxe de hai 30 anos, a moda volve recuperar este xesto tan sinxelo como unha forma de converter en tendencia un look no 2025.
Para ver que o de atarse a camisa (ou calquera outra peza de manga longa) á cadeira non é só unha idea tola dos looks de Instagram ou Tiktok só fai falta ver as novas fotazas cheas de ideas outonais de Zara. Polas rúas de Nova York ou Londres, na lista de materiais para a volta ao cole non falta unha camisa á cintura ou á cadeira. Aquí tampouco.