Seis praias galegas para botarse a durmir

Son centos as praias galegas que merecen unha mención, xa sexa pola súa area finísima, o seu mar aberto, a súa beleza salvaxe, polas súas recollidas augas, polos seus chiringuitos, o seu ambiente familiar ou a súa contorna natural. Pero hoxe en YES fixámonos naquelas que contan con piñeirais frondosos, praderías que serven para despregar todos os bártulos para un bo pícnic e que nos acubillan os días nos que o sol pega forte. Son perfectas para ir en familia, sobre todo con nenos pequenos, e ideais se se quere facer unha excursión na que aproveitar para facer incluso rutas a pé nalgunhas delas. Aquí van seis propostas para botarse a durmir unha boa sesta. 

 

Melide (Cangas)

En fronte tes as illas Cíes e para chegar a esta marabillosa praia non che queda máis remedio que deixar o coche e facer unha camiñada duns 15 minutos por un das paraxes máis impresionantes de Cangas. Pero a foto que se che queda na retina non defrauda. Mentres vas descendendo, entre os enormes piñeiros, vaise asomando esta preciosa praia, flanqueada por punta Robaleiro e punta Subrido. Conta con todos os servizos, pero como estás lonxe do coche, prepárate ben para pasar o día. FOTO: XOÁN CARLOS GIL

Balarés (Ponteceso)

Para ir con nenos pequenos é ideal e por suposto para gozar dun pícnic baixo un piñeiral frondoso, mirando o océano, nunha das mellores praias da Costa da Morte, na ría de Corme e Laxe. Este areal é perfecto para as sestas de verán e para os que prefiren a tortilla e os filetes empanados debaixo das árbores sen o abafo das areas e a antuca. Ti elixes se tomar o sol ou a sombra, pero poucos sitios de Galicia contan cunha pradería tan espectacular con semellante arboleda. Para aqueles que desexen tombarse a ler un libro tranquilamente é unha bo opción. 

Praia Xardín (Boiro)

É unha praia ou é un xardín? Pois as dúas combinacións á vez. Praia Xardín é un dos lugares máis atractivos para porse á fresca coa vista posta no mar. Conta con bancos e zonas de merendeiro, aínda que as familias tamén poden acampar ao seu aire con todos os bártulos. Como é unha praia sen ondada, é habitual que vaian moitos nenos e que o día se alongue no campo que está pegado á area. Por iso é polo que moitas cuadrillas, que foxen do sol abrasador, tómbense na herba para pasar tempo neste paraíso. FOTO: 

A Magdalena (Cabanas)

É unha praia recollida, ten bo acceso, uns estupendos chiringuitos na propia area e posúe unha das sombras máis cobizadas de Galicia ao longo dun quilómetro. Conta con bancos e mesas propias no merendeiro, pero as familias adoitan levar todo o necesario para gozar dun día de praia nos que a sombra é fundamental: para comer, xogar ás cartas, durmir, escoitar música baixo as árbores... Quen chega á Magdalena, en Cabanas, teñen, ademais, Pontedeume ao lado para dar un paseo. O baño, nesta zona da ría, está asegurado.

Cabío (A Pobra do Caramiñal)

 

 Algúns bañistas non necesitan nin antuca porque as propias árbores fan esa función na area, pero Cabío ten tamén un dos piñeirais máis reclamados por quen se achega a esta praia da Pobra do Caramiñal coñecida polas súas augas tranquilas e moi limpas, ademais de polo seu ambiente familiar. Se vas en fin de semana, nos meses de verán tes que ir cedo para poder aparcar.

Hai pistas para xogar ao fútbol e na contorna do piñeiral enorme hai un cámping por se te animas a pasar uns días nesta zona. Merece a pena. 

Area de Secada (A Illa de Arousa)

 

Se xa toda A Illa é un tesouro, atravesar o espeso piñeiral para chegar á praia de Area de Secada é outra fortuna que alegra cunha imaxe de postal: a area finísima, as rocas, as bateas e un mar en calma que invita o baño. Percorrer parte da zona a pé merece a pena, así que, se organizas unha excursión para pasar o día, mellor. Area de Secada ten chiringuitos para comer, aínda que o plan de tortilla ou bocadillo á sombra das árbores con esta paisaxe é máis que recomendable. A praia tamén é perfecta para ir en familia ou con nenos pequenos. 

---

---