VICHES os seus cintos de obra amarelos e ata poida que cruzáchesche con algunha das súas bolsas «Sculpture» para Ikea. El é Virgil Abloh, o deseñador máis carismático despois de Lagerfeld
23 mares 2020 . Actualizado ás 20:35 h.Ten 39 anos, a súa propia firma, Off White, é o director creativo da liña masculina dun dos pesos pesados da moda parisiense, Louis Vuitton, é DJ, enxeñeiro, artista… Poida que a Virgil Abloh aínda quede moito camiño para converterse no sucesor moral de Karl Lagerfeld, pero, de momento, este talento nativo da cultura urbana -creceu nun barrio nos arredores de Chicago- apunta xeitos como sucesor da figura magnética do «káiser». O New York Times lanzou a idea: É Virgil o novo Karl dos millennials? A resposta podería estar en Instagram, onde ten máis de cinco millóns de seguidores. Na súa biografía aparecen os seus estudos de enxeñería e arquitectura e unhas prácticas de seis meses en Fendi con Kanye West. No 2013 lanzou desde Milán o seu primeiro fillo, Off White, e o mundo encheuse de zapatillas, cintos amarelos tipo arnés de construción, de suadoiros… Fixo que a rúa se vestise… de rúa. Ten unha lexión de fans capaz de facer horas de cola para comprar a bolsa de papel da súa colección para Ikea. É o inventor moderno do «streetwear» e o mesmo que hai uns meses prognosticou a súa morte. É capaz de romper estereotipos con homes de rosa en Louis Vuitton e de facer que o mundo se derreta polas súas novas coleccións cunha lixeira variación das anteriores de só o 3%. É un líder dunha nova xeración.