O rexistro de casos activos aproxímase aos 2.800 tras os 203 novos contagios detectados onte
20 ene 2021 . Actualizado ás 12:42 h.A presión hospitalaria na área de Vigo segue aumentado. Actualmente, hai 112 persoas ingresadas en planta nos tres centros sanitarios de referencia covid e 22, nas uci do Hospital Álvaro Cunqueiro e Povisa. A cifra supera os datos dos últimos meses. A mediados do pasado mes de novembro, no pico máis alto da segunda onda, os mesmos hospitais tiñan 30 persoas menos ingresadas nas súas plantas e uci.
O último informe da Consellería de Sanidade recolle que na área sanitaria de Vigo hai 2.776 casos activos, un novo pico desde que comezou a pandemia. Nas últimas 24 horas, o Sergas rexistrou 203 novos contagios, mentres que o número de PCR realizadas situouse nas 2.579, e as probas serológicas, en 260. Desde o inicio da pandemia faleceron na área de Vigo 291 persoas, e curáronse 12.518.
Por municipios, a escalada continúa. O número de casos diagnosticados nos últimos catorce día no Concello de Vigo é de 1.039. Os outros municipios cunha forte subida son Tui (197), Ponteareas (193), Redondela (113) e Moaña (102). Fornelos, con menos de 25 casos diagnosticados en catorce día, e Cangas, na franxa que percorre de 150 a menos de 250, son os únicos municipios da área sanitaria que se manteñen por baixo do perigoso limiar dos 250 casos diagnosticados en catorce días por cada 100.000 habitantes.
