Abel Caballero critica a actuación da Xunta e a súa tardanza, e esta acúsalle de facerse unha foto innecesaria no Vao e «tapar as vergüezas do Goberno de Sánchez». Voluntarios retiran bolitas e outros microplásticos en Patos
09 ene 2024 . Actualizado ás 19:02 h.O Concello de Vigo non detectou pélets nas praias tras as inspeccións realizadas. O alcalde da cidade, Abel Caballero (PSOE), indicou no Vao que o Concello se está preparando para dar resposta a a «marea plástica que alaga Galicia». O goberno local asegura que localizaron tamizadores manuais que permiten retirar as bólas de plástico e pediu aos cidadáns que, se atopan os residuos, chamen ao teléfono municipal 010 ou se poñan en contacto coa Policía Local.
A pesar de non haber pélets de momento nas praias viguesas, Caballero cargou contra a Xunta de Galicia: «Onte pola tarde recibín unha carta do conselleiro de Mar na que nos trasladaba o protocolo de actuación, 23 días despois do accidente» do barco que perdeu os sacos. O rexedor socialista quere que os científicos do IEO analicen os pélets para descartar a súa toxicidade. Tamén criticou que o Goberno autonómico non elevase o nivel de urxencia para ter a colaboración do Goberno central.
A delegada da Xunta en Vigo, Ana Ortiz, criticou duramente a Caballero. Acúsalle de ir facerse unha foto nunha praia onde non hai contaminación e que non requiría a súa presenza. Ao seu xuízo, o que debería facer o rexedor dunha vez por todas é pedirlle explicacións ao Goberno de Pedro Sánchez por non asumir as súas competencias no mar e deixar de «tapar as súas vergoñas».
Nigrán
Preto de 150 persoas congregáronse na mañá deste martes na praia de Patos, en Nigrán, respondendo á convocatoria conxunta do Concello, a Asociación de Escolas de Surf e o Club Marítimo de Panxón. Os voluntarios peitearon o areal durante tres horas e sacaron centos de bólas. «Non se aprecian a simple vista como noutras praias de Galicia, pero buscando con paciencia aparecen», sostivo o alcalde do municipio, Juan González (PSOE).
Acompañados pola brigada ambiental do Concello, así como polo equipo de limpeza PreZero, os voluntarios pertrechados con cubos, escobas e peneiras aproveitaron de 10.00 a 13.00 horas para limpar tamén a area doutros microplásticos que había enterrados, un problema global sobre o que tamén se quere concienciar. As consignas básicas que se daban aos participantes eran non escavar na area, limpar só a capa superficial e protexer as mans con luvas, ademais de non extraer elementos naturais da praia. Os voluntarios foron distribuídos en filas.
A próxima convocatoria en Nigrán é para este xoves na praia da Madorra, ás catro da tarde. «A nosa mensaxe á Xunta é que en Nigrán non nos ímos cruzar de brazos agardando a que chegue axuda por outros medios ou que aparezan máis pélets», sinalou o rexedor socialista.
Nada en Cangas e A Guarda
En Cangas, non apareceron máis bólas nas praias de Nerga, Barra e Viñó desde a pasada fin de semana, aínda que foi moi pouca cantidade. Así o asegurou o concelleiro de Medio Ambiente, Antón Iglesias , que sinala que avisou dos achados Costas do Estado. Tamén peiteou a zona un axente da Xunta.
Na Guarda tampouco se volveron a rexistrar pélets, segundo o alcalde, desde que aparecesen o domingo menos de corenta en Area Grande. Este e outros dous areais están a inspeccionarse a diario.