Detidos dous mozos da Guarda e O Rosal como presuntos autores de roubos no punto limpo de Nigrán
NIGRÁN
Nas últimas datas habían vendido ferramentas, maquinaria e utensilios de uso doméstico nun establecemento de compra venda de obxectos de segunda man
21 oct 2020 . Actualizado ás 13:36 h.A Garda Civil detivo a dous mozos da Guarda e O Rosal como presuntos autores de preto de media ducia de roubos cometidos durante o mes pasado no punto limpo do municipio de Nigrán.
As investigacións levadas a cabo por efectivos do posto de Baiona-Nigrán iniciáronse por mor das denuncias presentadas polo responsable desta instalación, propiedade do Concello de Nigrán e destinada á recollida selectiva de residuos urbanos. En total presentáronse cinco denuncias.
Os supostos autores accedían ao interior das instalacións despois de cortar a reixa perimetral do recinto. Unha vez no interior forzaban os cadeados das distintas dependencias onde se depositaban os residuos clasificados para levar chatarra, electrodomésticos, ferramentas e pezas metálicas, fundamentalmente.
As pescudas concluíron coa súa identificación e localización, dous mozos de 19 e 24 anos, veciños do Rosal e A Guarda, respectivamente, que foron detidos como presuntos autores dos cinco roubos que se cometeron no citado punto limpo durante o pasado mes de setembro.
No marco da mesma investigación, a Garda Civil pescudou que estes mesmos mozos tamén efectuaran durante as últimas datas varias vendas de ferramentas, maquinaria e utensilios de uso doméstico, cuxa procedencia se descoñece ata o momento, nun establecemento de compra venda de obxectos de segunda man.
Unha vez que prestaron declaración en dependencias da Garda Civil, os detidos foron postos en liberdade e deberán comparecer cando sexan citados no xulgado de instrución número seis de Vigo, onde se entregaron as dilixencias instruídas.