A Garda Civil e a Policía Local de Moaña abortan unha pelexa con público entre dous adolescentes

A Garda Civil e a Policía Local de Moaña abortaron esta fin de semana unha pelexa que mobilizou a decenas de mozos da área de Vigo. Segundo confirmou a Comandancia da Garda Civil de Pontevedra, dous adolescentes de catorce anos foron os que se citaron para resolver cos puños o seu enfrontamento.

Non transcenderon as causas da disputa pero, ao parecer, ten orixe sentimental. As mesmas fontes indicaron que os demais mozos que se reuniron o venres, ás sete menos cuarto da tarde, diante do Concello de Moaña, ían só como espectadores e non a tomar parte na pelexa. Ao parecer, a cita dos adolescentes tivo un efecto chamada sobre os outros, chegados desde Cangas, Vigo e Moaña. A Garda Civil explica que «non se produciu ningún incidente porque se atallou o problema». Hai, polo menos, iso si, dous mozos identificados, pero non se chegou a practicar ningún arresto. 

---

---

---