![](https://img.lavdg.com/sc/F0nQ2Bdrr1xwJYFNe0QuUrmK0zU=/480x/2023/05/29/00121685314562485850906/Foto/V29Y3003.jpg)
Os nacionalistas gobernarán en Tomiño e Mondariz-Balneario e deberán pactar no Rosal, mentres que perden As Neves
29 may 2023 . Actualizado á 05:00 h.Leticia Santos volverá ser alcaldesa de Moaña ao lograr o BNG unha folgada maioría absoluta ao pasar dos sete aos dez concelleiros nas eleccións de onte. A lista do PP mantén o mesmo número de edís, mentres que o PSdeG-PSOE perde un membro na corporación.
Os nacionalistas tamén lograron a maioría absoluta no municipio de Mondariz-Balneario, feudo desde hai corenta anos de José Antonio Lorenzo, que nestas últimas eleccións xa non se presentou. O BNG logrou pasar de tres a cinco edís, mentres que o PP perdeu esas dúas actas de concelleiros.
Tomiño segue sendo unha das prazas fortes do BNG a pesar de que perdeu onte dous concelleiros, que foron parar á lista do PP. Sandra González manterá a alcaldía xa que segue contando coa maioría na corporación.
No Rosal, a nacionalista Ánxela Fernández perdeu un concelleiro, aínda que poderá manter a alcaldía se chega a un acordo de goberno co PSdeG-PSOE
Caso máis complicado preséntase na Guarda onde o PSdeG-PSOE perdeu dous concelleiros, mentres que o BNG suma cinco. Pola súa banda, o PP, con Roberto Carrera, subiu dous edís, logrando oito actas. O desempate queda en mans de Espazo Común, liderado polo veterano Celso Rodríguez Fariña, home que o pasado, cando militaba en Esquerda Unida, fixo posible que saíse adiante unha moción de censura promovida polo PP contra o alcalde socialista José Manuel Domínguez Freitas. A resolución da alcaldía guardesa queda agora nas súas mans. Onde si perderá a alcaldía o BNG é nAs Neves. Xosé Manuel Rodríguez non seguirá como alcalde debido a que a lista do PP, liderada por José Manuel Alfonso, logrou a maioría ao conseguir seis concelleiros nos comicios de onte.