A rama dunha árbore golpeoulle na cabeza en Gondomar
24 abr 2024 . Actualizado á 16:29 h.Conmoción en Gondomar e Tomiño tras a morte dun tomiñés nun tráxico accidente laboral. A Garda Civil confirmou o falecemento do home, que participaba nuns traballos de talla e limpeza no alto de Santo Antoniño. O sinistro produciuse sobre a unha da tarde cando se estaban realizando a roza a zona. Ao parecer e, segundo o testemuño dun compañeiro, ambos estaban a realizar unha talla cando observou como a vítima caía ao chan derrubado ao golpearlle unha rama na cabeza.
O home, A.M.I., de 56 anos xacía inconsciente cando se alertou aos servizos de emerxencias do 112. Unha dotación do 061 desprazouse de inmediato ao lugar dos feitos para intentar reanimalo pero os esforzos resultaron infrutuosos. O cadáver foi trasladado ao anatómico forense para poder practicar a autopsia que determinará a causa exacta do falecemento, A Garda Civil investiga os feitos.
Hai un mes produciuse un accidente similar en Ponteareas aínda que, naquela ocasión, a vítima traballaba nunha parcela da súa propiedade en compañía dun amigo. O home foi golpeado por unha árbore que estaba a tallar nunha leira situada na parroquia ponteareá de Xinzo e faleceu no acto.