Os lalinenses Brais González e Cecilia Cacheda seguirán unha tempada máis competindo na máxima categoría do balonmán español. Ambos chegaron a acordos cos seus respectivos clubs para prolongar o seu contrato ata o 2025. En primeiro lugar, Brais González continuará en Asobal co BM Cangas Frigoríficos do Morrazo.
O lateral zurdo cumprirá a súa sexta tempada no conxunto dirixido por Nacho Moyano. Aos seus 22 anos converteuse nunha das pezas máis destacadas do persoal, especialmente pola súa capacidade goleadora. Desde a súa chegada na tempada 19-20, Brais fíxose cun papel relevante no equipo aos poucos, especialmente con máis intensidade a partir do ano pasado.
Pola súa banda, Cecilia Cacheda seguirá na disciplina do Atlético Guardés da liga Guerreiras Iberdrola ata xuño do 2025. «Estou moi contenta tras a renovación. Creo que este primeiro ano na Guarda foi moi bo. O equipo deume unha estabilidade a nivel persoal que levaba tempo buscando e necesitaba. Creo que é motivo suficiente para seguir na Guarda e ter ese aliciente de querer seguir gañando», declarou.