Os populares acusan o tripartito de «non facer nada en materia de vivenda»
21 mares 2024 . Actualizado ás 05:00 h.O PP de Cangas reclama ao goberno local que poña en funcionamento canto antes a Casa dous Pobres, inmoble que foi rehabilitado coa intención de destinalo ao uso de Servizos Sociais. A idea é que poida acoller temporalmente a persoas vulnerables, con prioridade para as vítimas de violencia de xénero. Os populares urxen ademais que se rehabiliten e desafecten as vivendas dos mestres baleiras coa mesma finalidade e que se tramite o PXOM para permitir unha maior oferta, «reservando parte da edificabilidade para vivenda pública, entre outras medidas». «Iso é gobernar. Para non facer absolutamente nada é mellor que se vaian para casa», din.
O PP acusa ao concelleiro de Urbanismo, Antón Iglesias de «non enfrontar os problemas da vivenda» e de «botar balóns fóra». Critican que non acudise á reunión coa Xunta da semana pasada na que se abordou a aplicación da Lei Estatal de Vivenda «cando o mercado inmobiliario municipal está moi descompensado, con moita demanda de vivendas sen apenas oferta». Sosteñen que a situación está «paralizada» e din que «en oito anos non se fixo nada en materia de vivenda, as últimas vivendas de protección oficial da nosa vila foron realizadas cun goberno do PP».