A condutora quixo atallar para esquivar o atasco de entrada á vila turística o día festivo, sen darse conta de que o antigo paso sobre o río Groba de Sabarís é peonil
20 ago 2025 . Actualizado á 00:56 h.Un descoido provocou que unha condutora, sobre as catro e media da tarde do venres, descendese co seu vehículo polas escaleiras da ponte da praza Victoria Cadaval de Sabarís, en Baiona. A muller, veciña de Gondomar, circulaba cara a Baiona e, para evitar o intenso tráfico desa hora nas estradas miñoranas, optou por un desvío. Tomou a rúa Do Escandalo e, debido a que a praza está en obras, continuou por unha vía paralela que pasaba diante dun restaurante coa terraza chea de clientes. As persoas que se atopaban nese momento, observaron incredulidade a traxectoria da condutora.
Pensando que a pequena ponte que ía cruzar non tiña escaleiras, proseguiu a marcha ata quedar atrapada nos chanzos de pedra. Con todo, este antigo paso de pedra granítica é peonil e non está preparado para o paso de vehículos. A muller deuse un gran susto cando se deu conta da súa equivocación. Un guindastre de grandes dimensións retirou o coche e volveuno a colocar sobre a ponte. A condutora puido saír do lugar dando marcha atrás.
Veciños da zona sinalaron que este é o segundo vehículo que queda atrapado nas escaleiras na mesma xornada. O incidente espertou a curiosidade de numerosos transeúntes, que fotografaron a escena e preguntábanse como chegara o coche ata alí. Esta vez, non foi por culpa do GPS.