Un condutor morre ao estrelarse contra unha arqueta e arder o seu coche na Cañiza
A CAÑIZA
Todo apunta a que o home, de 54 anos, sufriu un desmaio e saíuse da vía
21 sep 2023 . Actualizado á 22:57 h.O condutor J.M.B., veciño de Ponteareas e de 54 anos, faleceu esta tarde ao chocar na Cañiza contra unha arqueta e arder o seu vehículo, un Renault 5, que quedou calcinado. Os veciños atoparon ao accidentado inconsciente dentro do turismo e sacárono do vehículo pero os servizos sanitarios intentaron reanimalo sen éxito e nada puideron facer por salvarlle a vida. Todo apunta a que o condutor sufriu unha indisposición cando circulaba e saíuse da vía. A autopsia determinará se este faleceu por un fallo cardíaco, segundos antes do accidente, ou polo golpe sufrido na colisión, que, segundo testemuñas, parece de escasa consideración.
O accidente foi ás 17.20 horas cando o condutor circulaba pola estrada comarcal PO-5001 en dirección á Cañiza, saíuse da vía e estrelouse contra a rede de sumidoiros de recollida de augas da estrada. Pouco despois, o coche, un modelo de máis de 30 anos de antigüidade, empezou a arder. Os bombeiros de Ponteareas extinguiron o lume aínda que o vehículo quedou calcinado.
O 061 enviou unha ambulancia de soporte vital básico, equipo sanitario de atención primaria e o helicóptero con base en Ourense. O facultativo confirmou o falecemento no mesmo punto de atención.