O sinistro afecta as instalacións do Grupo Couceiro
17 may 2025 . Actualizado á 15:34 h.Xornada de intenso traballo para os servizos de emerxencias de Galicia e Valença en pleno festivo local por un grande incendio industrial que obrigou á Xunta a activar o plan Platerga no Porriño. Un amplo dispositivo de todos os corpos e forzas de seguridade con competencias na zona foron despregados pouco despois das once da mañá, despois de que se recibisen as primeiras alertas dun incendio de grandes dimensións na nave de Couceiro, situada no polígono industrial das Gándaras.
Unha gran columna de fume púidose ver desde Tui e toda a comarca do Louro. O incendio afectou á planta de reciclaxe de lixo da empresa transportes Couceiro, que se dedica á xestión integral de residuos. A Xunta de Galicia activou o Plan Territorial de Emerxencias de Galicia (Platerga, o que implica a mobilización de recursos de ámbito local e supralocal, co obxectivo de facer fronte á situación de risco e garantir unha resposta eficaz e coordinada entre os organismos intervenientes).De inmediato, púxose en marcha un operativo no que participan os bombeiros do Porriño, Morrazo, Vigo, Ribadumia e Valença, así como o GES de Mos. Tamén interveñen axentes da Garda Civil e da Policía Local.
O Servizo de Urxencias Sanitarias de Galicia-061 desprazou unha dotación ao lugar, aínda que, segundo a información dispoñible, non se ten constancia de danos persoais polo momento. Ademais, o Grupo de Apoio Loxístico (GALI) mobilizou unha cisterna de gran capacidade para reforzar os labores de extinción.
Segundo os últimos datos recolleitos polo 112 Galicia, sobre as dúas da tarde, os equipos de intervención continúan traballando intensamente na zona. Identificáronse dúas áreas especialmente sensibles dentro da nave: unha zona de almacenamento de plásticos, altamente inflamables, e outra na que arden rodas, o que complica as tarefas de extinción debido ao tipo de material. A pesar diso, o lume atópase perimetrado, o que permite aos efectivos centrarse no seu control total e evitar que se propague a outras instalacións próximas. Ao parecer, o lume declarouse na zona de almacenamento, pero aínda non se determinou ningunha causa oficial.
Todas as actuacións hoxe céntranse en minimizar o impacto ás instalacións e os danos materiais. Non houbo que lamentar ningún ferido. É a terceira vez desde o 2008 que a empresa sofre un incendio. O máis forte ocorreu no 2018.