A mensaxe que motivou un despedimento fulminante: «Hoxe non teño coche, non vou traballar»

e. v. pita VIGO / LA VOZ

VIGO

O caso chegou ata o Tribunal Supremo Borja Sánchez-Trillo | EFE

A empresa tomoullo como unha dimisión tácita da traballadora pero o Tribunal Supremo non ve vontade de marcharse voluntariamente, corrixe a un xuíz de Vigo e conclúe que o despedimento foi improcedente

21 nov 2024 . Actualizado á 00:29 h.

Unha operaria dunha ETT que acababa de recibir a alta médica e non foi traballar porque ese día non tiña coche foi despedida, pero agora o Tribunal Supremo considera que o seu cesamento foi improcedente. A empresa dicía que o que fixo a traballadora foi dimitir tacitamente e un xuíz de Vigo deulle a razón. Con todo, o Tribunal Superior de Galicia entendeu que se trataba dun despedimento improcedente, o mesmo que o Tribunal Supremo, que inadmitiu o recurso de casación da empresa.

Todo empezou no 2022, cando a traballadora escribiu un wasap á empresa e díxolle: «Van dar a alta, pero non me vou a incorporar ao posto, que non teño coche. Logo envíoche a alta». A empresa respondeulle: «Unha vez que tes a alta tes que incorporarte xa que o teu contrato segue activo». A empregada replicou: «Non teño en que ir, dásme de baixa e xa está». A empresa contestou: «Ao deixar o teu posto é unha baixa voluntaria» e envioulle un formulario de baixa voluntaria para que o enchese.

A traballadora remitiu o parte de alta da mutua esa mesma tarde pero, ao día seguinte, a empresa replicoulle: «Grazas, quedamos pendentes de que nos envíes urxentemente a baixa voluntaria, xa que ao non incorporarte ao teu posto o procedemento é a baixa voluntaria».

A empregada pediu a declaración de improcedencia porque considerou que non se producira unha dimisión tacita. O Xulgado do Social número 6 de Vigo deu a razón á empresa e avalou o despedimento no 2023 porque deduciu que a traballadora dimitira voluntariamente.

En xaneiro, o TSXG revogou esa sentenza porque a traballadora non encheu o formulario de baixa e só enviou o parte de alta o mesmo día en que a empresa a deu de baixa na Seguridade Social. «Non se acreditou que existise unha vontade clara e concluínte por parte da traballadora de extinguir a relación laboral polo que existe un despedimento, e non unha dimisión, que é cualificado de improcedente», afirma a sala.

Nunha sentenza do 29 de outubro, o Tribunal Supremo chega á mesma conclusión: Dicir que non ten coche «non expresa unha vontade clara e concluínte de extinguir a relación».