Marcos Mezquida e Salvador Sobral abrirán o Festival Ikfem Tui-Valença o 17 de xullo
VIGO
O evento ofrecerá unha maridaxe entre as culturas de ambas as beiras do Miño
31 may 2024 . Actualizado á 05:00 h.Do 17 ao 21 de xullo desenvolverase a décimo segunda edición do Festival Ikfem Tui-Valença. Cada un dos concertos incluídos na programación pretende ser unha maridaxe única entre as culturas das dúas ribeiras do Miño, pero tamén son o resultado de fusións musicais e dunha variedade de xéneros que abraza desde a lírica ao pop, desde o jazz e o rock ao sinfónico ou o fado.
Os pianista Marcos Mezquida e o cantante Salvador Sobral abrirá o festival o 17 de xullo en Valença do Miño cun concerto titulado Cousa de dois. Ao día seguinte, a igrexa de Santo Domingo, en Tui, acollerá o concerto Conexións atlánticas, protagonizado pola soprano María Hinojosa Montenegro e o trío Preseli. Estará baseado nun poema de Valentín Paz-Andrade musicalizado polo compostelán Fernando Buide, e versos de José Carlos González trasladado a partitura polo compositor e pianista portugués António Victorino D'Almeida.
Un dos eventos máis singulares desta edición será a actuación dunha icona da música portuguesa, Jorge Palma, un artista que fusiona brillantemente a influencia clásica co rock'n'roll e a música popular, esta vez acompañado por unha nacente Orquestra Sinfónica Eurorrexión Galicia-Norte de Portugal.
A colaboración entre as dúas beiras do Miño volverá quedar reflectida no concerto que protagonizarán o pianista portugués Mário Laginha e o pianista español Chano Domínguez na alameda de Tui o 20 de xullo. Esta interacción repetirase co Coro da Orquestra Sinfónica de Galicia e o organista Adrián Regueiro.
Ikfem Festival Tui-Valença conmemorará o 50 aniversario da Revolución dos Caraveis cun programa musical ibérico sinfónico creado para a ocasión, evocando a historia compartida e os procesos de transición para a democracia en Portugal e España.