O proxecto foi asinado por Caballero e Ana Pastor no 2016
11 may 2024 . Actualizado ás 05:00 h.O alcalde de Vigo, Abel Caballero, anunciou onte que o proxecto de remodelación da avenida de Madrid proposto polo Goberno empezará no 2025. O seu custo elevarase case a 17 millóns de euros. A xunta local de goberno deulle o visto e prace. Vigo leva oito anos á espera de mellorar a principal entrada na cidade, desde que Ana Pastor, cando era ministra de Fomento, e o propio Caballero asinaron o acordo de colaboración para converter este tramo nun bulevar urbano.
O rexedor avanzou que se licitará e adxudicará o proxecto coa expectativa de que as obras poidan comezar «despois de Nadal». A remodelación conta cun orzamento de 16,8 millóns de euros, dos que o Goberno central achegará 11,2, ademais do proxecto de construción, valorado en 466.028 euros.
A saída a Madrid quedará plenamente integrada na cidade como unha gran avenida na que se aumentarán pasos de peóns e que estará dotada de elementos de deseño e estéticos seguindo os modelos de humanización desenvolvidos nos últimos anos en oras zonas da cidade.
O PP avisou nos últimos meses de que a tardanza na que incorreron o Ministerio de Transportes e o Concello de Vigo para aprobar o proxecto ía deixar sen executar a partida de 7 millóns de euros orzada para o exercicio do 2024.
Unha circunstancia que agora admite o propio alcalde, que acusaba a Xunta de atrasar a aprobación do proxecto, un paso que se podía dar sen agardar ás autorizacións de Augas de Galicia e de Patrimonio, que ademais se pronunciaron en dous meses, acurtando os prazos legais. O 29 de abril, Patrimonio da Xunta autorizou a reforma do tramo da A-55 entre a praza de España e a intersección en glorieta partida coa rúa Gandarón. A resolución explica que na contorna de protección existen varios elementos catalogados (pazo, xardíns e capela de San Roque, Policlínico Cíes, Colexio Fogar e pazo da Raposeira), polo que lembra que as intervencións a realizar «resultarán armoniosas coas condicións características do ámbito».