O alcalde atribúe as conexións ao interese da propia empresa de transporte porque «hai demanda» mentres estea pechado o aeroporto de Peinador
08 may 2024 . Actualizado ás 13:36 h.O alcalde de Vigo non está contento, nin moito menos, co anuncio da Xunta de que se activarán conexións en autobús desde a cidade olívica ata o aeroporto de Lavacolla mentres a terminal de Peinador permaneza pechada por obras. Abel Caballero quere que esas liñas sexan subvencionadas pola Administración galega. «O que ten que facer a Xunta é pagar lanzadeiras», asegurou hoxe nuns dos audios gravados que enviou aos medios de comunicación.
O rexedor socialista acusa a Xunta de mentir: «Inventáronse que puxeron autobuses». Caballero atribúe o servizo ao feito de que a empresa que ten a concesión foi a primeira interesada porque neste momento hai demanda e faino «cobrando o prezo que ten que cobrar». O peche de Peinador ata o 30 de maio para renovar a pista do aeroporto obrigou a reprogramar todos os voos e que miles de pasaxeiros teñan que embarcar en Santiago.
A Xunta sinalou o martes que negociara coas concesionarias para pór frecuencias diarias ata Lavacolla ante a falta de alternativas por parte de Aena e de Caballero, que o ano pasado prometeu que poría lanzadeiras e agora esixe que o faga a Xunta.
O alcalde enxalza ao Goberno central por investir case 30 millóns na cidade e incide en que a Xunta «non coopera facilitando o desprazamento». As súas críticas foron máis aló, mesmo: «Para a Xunta, Vigo non existe. Se isto chega a pasar noutro lugar de Galicia poría lanzadeiras. Como é Vigo, non pon nada de nada de nada».