Os dous detidos postos ao dispor xudicial polo narcosubmarino Poseidón quedan en liberdade investigados por un delito de contrabando

Das seis detencións realizadas esta semana polo narcosubmarino Poseidón, achado hai 13 meses na ría de Arousa, só dúas pasaron este xoves a disposición xudicial. Un é Juan Manuel Vidal, coñecido como o Burro e principal investigado, que chegou este xoves aos xulgados de Vilagarcía escoltado pola Garda Civil e o rostro cuberto.

O outro detido, galego pero residente en Forteventura, compareceu por videoconferencia desde os xulgados da illa. A xuíza titular do Xulgado número 1 de Vilagarcía deixou en liberdade a ambos, coa obrigación de comparecer cada 15 días, pero investigados pola presunta comisión comisión dun delito de contrabando. Non de tráfico de drogas ou organización criminal. 

A imputación dos investigados sustentaríase nun informe que reconstrúe a traxectoria do narcosubmarino na ría de Arousa e de dúas planadoras que saíron ao seu encontro para recoller os 5.000 quilos de cocaína que transportaba e á tripulación. Ambas as lanchas, segundo o mesmo informe, regresarían a terra para desembarcar a droga na nave de Vilaxoán rexistrada esta semana e propiedade de Vidal.

A maiores, comisáronse varias embarcacións que por dimensións e potencia dos motores serían ilegais. Pero nada de todo isto resulta suficiente para demotrar xudicialmente o delito de tráfico de drogas, nin o de integración de grupo criminal. Ocorre o mesmo cos outros dez investigados e detidos polas dúas narcolanchas varadas hai tamén 13 meses na costa de Ribeira, a pesar de os indicios e antecedentes dos sospeitosos. A clave do seu defensa está que ninguén pode probar que a súa saída ao mar a bordo desas embarcacións construídas unicamente para traficar tiña como finalidade atoparse co Poseidón precisamente porque a presión de Vixilancia Aduaneira e a Policía Nacional frustrou esa cita en augas abertas.

---

---

---