A especie é única en Galicia e sera secuenciada por unha científica da Universidade da Coruña
10 abr 2024 . Actualizado á 05:00 h.A «herba de namorar» das illas Cíes é única en Galicia. Seguramente, para a tradición, como ocorre coas outras dúas especies presentes na comunidade, tamén sirva para namorar a unha persoa introducindo ás agachadas a flor nun dos seus petos, pero será distinta ás que se recollan en terra firme. Tamén a planta. As Cíes contan coa única poboación de Armeria pungens do norte de Europa. A máis próxima está a 400 quilómetros, xusto ao sur de Lisboa.
Esta variedade única será secuenciada xeneticamente pola investigadora do Grupo de Investigación en Bioloxía Evolutiva (GIBE) da Universidade da Coruña, Rosalía Piñeiro, para ser incluída no Atlas de Xenoma da Biodiversidade Europea, un paso de relevancia «para coñecer o pasado da biodiversidade da terra e ter unha mirada ao futuro e ás adaptacións evolutivas das especies para afrontar os cambios climáticos».
Por que só se atopa nas Cíes? «Non o sabemos. Aínda que no caso de Córsega e Sardeña estimamos que proceden dunha introdución recente desde poboacións do centro ou sur de Portugal, o caso das Cíes parece máis complexo», conta Piñeiro. «Podería proceder dunha distribución ancestral no continente que aguantou polo seu illamento xeográfico e suave clima», engade. Tamén é posible que a supervivencia desta especie mediterránea débase ao intercambio xenético coa especie A. welwitschii, que hoxe se distribúe na costa portuguesa, xusto ao norte da última poboación de «herba de namorar» antes das Cíes.
Piñeiro destaca ademais que secuenciar o seu xenoma completo «permitirá dilucidar escenarios complexos e a orixe da«herba de namorar» das Cíes, unha incógnita que non se podía resolver coas técnicas clásicas».