A compaña de teatro galega A Panadaría denuncia insultos de adolescentes nunha función en Canarias: «¡Limpa, puta!»
VIGO
Ocorreu durante representábana da obra As que limpan, galardoada na última edición dos Premios María Casares
22 abr 2023 . Actualizado ás 20:32 h.«¡Limpa, puta!» foi un dos primeiros berros que oíron as compoñentes da compaña galega de teatro A Panadaría durante unha representación da obra As que limpan. Denúnciano Areta Bolado, Ailén Kendelmán e Noelia Castro, as tres integrantes do grupo, nas súas redes sociais. Ocorreu o pasado venres na localidade canaria de Santa Lucía de Tirajana. A Panadaría foi invitada a participar no Festival Espal, Encontro Solidario coas Vilas de África e Latinoamérica, para realizar dúas funcións de , As que limpanobra que denuncia o abuso que sofren as camareiras de piso e que recibiu catro galardoes na última edición dos Premios de Teatro María Casares.
As actrices relatan que, ante un auditorio de 600 alumnos e alumnas de institutos, unha vez que se apagaron as luces para comezar a función, comezaron a escoitar berros proferidos contra elas. «Era un boureo agresivo, violento, ruxía o alumnado e Noelia entraba amodo no escenario, a escuras, en silencio, varrendo. A luz ía entrando pero o barullo non baixaba. A luz subía paseniño e as tres varrendo, caladas. Entre os berros escoitase unha voz, dun rapaz, que grita con rabia "limpia, puta!"». A partir dese momento, e durante os noventa minutos que durou a obra, segundo as actrices, non cesaron «os silbidos, insultos, abucheos, comentarios sexuais, grupos entrando e saíndo do teatro, risos burlóns e ameazas. E, durante a obra, repetíanse os berros de "putas, putas!"».
Areta, Ailén e Noelia sinalan que non conseguían facerse escoitar polo auditorio. «Que cedo aprenden os homes a insultarnos con ese "puta". O peor insulto, o máis humillante, o que non ten equivalente en masculino (ou si? Ai, si, fillo de puta). E din puta e tratan de humillarnos, como se o noso corpo non fora noso, como se a nosa dignidade dependese de que fagamos ou non con el o que nos pete», reflexionan.
Xa ao finalizar a obra, Ailén dirixiuse a quen berraban: «A nós non nos insultades con iso. Insulto é ser puteiro». A resposta desde o auditorio foron máis berros, segundo a Panadaría. Este xornal púxose en contacto coas actrices para coñecer máis detalles do incidente, pero declinaron facer máis declaracións que as publicadas nas súas redes sociais.
No seu escrito si quixeron reflectir que non todas as persoas presentes actuaron do mesmo xeito. Con todo, dan as grazas aos organizadores por presentar no seu festival o seu espectáculo feminista. «Seguimos adiante, o mundo vai ser feminista porque non imos parar», dixeron para finalizar a súa denuncia.