A Audiencia Nacional exculpa a varios sindicatos na carga de vehículos
31 mares 2023 . Actualizado ás 05:00 h.Multas millonarias para catro operadoras ou consignatarias do porto de Vigo por unha trama de colusión urdida para restrinxir a competencia na contratación de estibadores alleos á Sagep que embarcaron coches sen matricular no porto de Vigo entre o 2010 e o 2016. A Audiencia Nacional sancionou con 1,48 millóns de euros a Bergé Marítima SL, con 700.000 euros a Terminais Marítimas de Vigo SLU, con 490.000 a Pérez Torres Marítima SL e con 199.270 euros a Liñas Marítimas Españolas SA. En conxunto, as sancións suman 2,86 millóns por falsear o xogo da competencia.
Na sentenza publicada o 2 de marzo, a Audiencia Nacional elimina por falta de probas a responsabilidade e anula as multas de 170.000 euros impostas aos sindicatos CC.OO. e UGT e outra de 70.000 á CIG. Pola súa banda, a Sociedade Anónima de Xestión de Estibadores Portuarios de Vigo (Sagep) logrou librarse dunha multa de 100.000 euros porque a contía non estaba motivada. Outros sindicatos tamén viron anuladas as súas sancións.
A sección sexta da sala do Contencioso-Administrativo da Audiencia Nacional confirmou unha sanción de 1,48 millóns de euros que impuxo a Comisión Nacional dos Mercados e a Competencia (CNMC) á operadora de buques Bergé Marítima SL pola realización de prácticas restritivas da competencia na estiba. Atribúenlle unha «infracción moi grave» por adoptar acordos co fin de harmonizar as condicións de contratación das empresas estibadoras para reservar en exclusiva ou limitar de xeito inxustificado en favor do persoal de Sagep de Vigo a prestación dos servizos de embarque e desembarque de vehículos, e de recepción e entrega de mercancías, entre o 2010 e o 2016, ao eludir a nova normativa liberalizadora.
No seu día, a dirección de Competencia da CNMC considerou que as empresas consignatarias e estibadoras sancionadas e a Sagep, en colaboración cos sindicatos con representación no comité de empresa, adoptaron acordos anticompetitivos prohibidos. Entende que alteraron sen amparo legal o funcionamento do mercado da prestación dos servizos complementarios da estiba e do seu exercicio, así como a carga e descarga de vehículos a motor sen matricular no porto de Vigo «ao impor unhas condicións uniformes e claramente restritivas da competencia na contratación de traballadores para a prestación dos devanditos servizos non portuarios», que estaban liberalizados por lei. A CNMC descubriu que só permitían a contratación libre en caso de exceso de demanda cando o persoal da Sagep dobrase.
A trama tiña como obxecto bloquear ou restrinxir indebidamente a contratación polas empresas de traballadores alleos á Sagep, «eliminando a autonomía contractual dos operadores presentes no mercado». A sala engade que o pacto incluía diversas obrigacións da Autoridade Portuaria de Vigo en relación á emisión de licenzas ou autorizacións para realizar actividades no porto, impondo o uso polas empresas autorizadas de persoal integrado nos censos da SEED ou da Sagep.
O fallo sinala que as empresas non poden alegar que sufriron medidas de presión por parte dos traballadores con folgas salvaxes e boicots. En todo caso, indica, tiveron a oportunidade de denuncialo.
A sentenza, que é susceptible de recurso de casación, impón a Bergé Marítima as costas procesuais.