Os de Jacobo Montes teñen catro partidos por diante para defender a súa praza de play-off
21 abr 2022 . Actualizado ás 05:00 h.O Coruxo enfróntase ao tramo decisivo da tempada, que afronta nos postos de play-off aos que accedeu grazas á súa vitoria da pasada fin de semana fronte ao Bergantiños (1-0). Os de Jacobo Montes son quintos con 43 puntos, pero a liga en Segunda RFEF está tremendamente igualada e queda todo por decidir nestas xornadas finais.
O calendario depáralles aos verdes encontros contra catro rivais que en todos os casos están por baixo deles e que, en maior ou menos medida, están implicados na pelexa pola salvación. De feito, e aínda que con moitos conxuntos polo medio, o conxunto vigués só ten unha marxe de seis puntos sobre a zona vermella. Máis lonxe quedan as tres primeiras prazas, a quince, catorce e dez puntos.
Este próximo domingo, o Coruxo visita a un Arenteiro ao que saca tres puntos e ao que venceu na ida. Os do Carballiño están fóra da zona de descenso, pero non deben descoidarse para evitar sustos, xa que a súa marxe é só de tres. Están en xogo a gol average particular entre ambos os equipos.
O compromiso máis inmediato no Vao, correspondente á xornada 32, será a fin de semana do 1 de maio. Recibirán os vigueses a un Marino de Luanco en descenso e con seis puntos de desvantaxe respecto deles. O resultado do duelo de ida foi de empate sen goles, polo que a gol average está, así mesmo, completamente no aire.
Tamén en descenso está o penúltimo equipo co que se verán as caras na liga regular, un Llanera que é antepenúltimo e está a tres puntos da salvación. Na primeira volta, como local, o Coruxo sacou os tres puntos cun 2-0.
O peche da competición doméstica para os vigueses será fronte á Ximnástica Segoviana, o rival que mellor clasificación ten agora mesmo dos que quedan. Van décimos con 39 puntos. Ademais, na idea levaron os tres puntos ante o Coruxo no seu campo ao gañar por 2-0. Así, o balance na primeira metade do campionato contra os rivais que restan é de sete puntos de doce.
Tres gol averages gañadas
En canto aos seus rivais directos por meterse no play-off, o Coruxo tenlle gañado a gol average a Palencia (4-3) e Bergantiños (1-0), mentres que o ten perdido co Leganés B (1-2), empatado co Compostela (1-1) e por decidir fronte ao Arenteiro no duelo desta fin de semana.