Derivará aos pacientes a centros externos, aos que pagará 700.000 euros anuais
08 jul 2020 . Actualizado ás 05:00 h.O Servizo Galego de Saúde vai asinar dous novos concertos na área de Vigo con dúas entidades privadas que se encargarán de proporcionar os servizos de atención temperá, rehabilitación e logopedia infantís, así como de logopedia de adultos, aínda que poderían ser a mesma entidade se durante a contratación se fai co servizo de adultos e co infantil. O Sergas considera que neste momento «non dispón dous recursos, tanto materiais como humanos» para dar esta prestación en por si, segundo recollen os pregos do contrato.
Pagará 1,36 millóns de euros nos próximos dous anos (case 700.000 ao ano) para poder derivar aos pacientes a un centro externo aos hospitais e centros de saúde de Vigo. Os pacientes serán derivados polo servizo de rehabilitación do Complexo Hospitalario Universitario de Vigo.
A logopedia de adultos -a partir dos quince anos- custará á Administración sanitaria 79.000 euros anuais. Diríxese a persoas que sofren disfonías funcionais ou orgánicas da voz, así como problemas da deglución. Son tratamentos de entre 12 e 42 sesións, dependendo de cada caso. O Sergas esixe que o contratista achegue polo menos un logopeda, pero poden ser máis.
A atención temperá, rehabilitación e logopedia infantís suporán un gasto estimado de 600.000 euros ao ano. A atención temperá é a que reciben os nenos de ata seis anos que teñen problemas do desenvolvemento ou que teñen risco de padecelos. Abarca desde os bebés que nacen con parálise cerebral ata os que presentan trastornos do espectro autista. De xeito preventivo tamén se inclúe nestes tratamentos aos grandes prematuros. A rehabilitación, é a partir dos seis anos. Este lote do contrato é máis custoso porque se pide un equipo con logopeda, fisioterapeuta, psicólogo, terapeuta e terapeuta ocupacional, como mínimo.
En realidade os gastos son estimados, posto que o Sergas calculou un prezo por cada sesión de tratamento de 13,50 euros a individual e 4,50 a grupal, que é menos do que lle custa a un particular un servizo similar. Para chegar a ese prezo ten en conta o que cobra un profesional segundo o convenio colectivo provincial, con salarios inferiores ao que abona o propio Sergas.
Ata o momento, o Sergas non tiña este concerto, senón que ía facendo o que administrativamente se chaman autorizacións de uso, é dicir, pagar ás empresas ás que derivaba aos pacientes. A San Rafael estiveron a derivarse tratamentos, pero suspendéronse. Isto provocou grandes listas de espera, de ata dous anos, segundo denunciou esta mesma semana o colectivo de terapeutas do Sergas en Vigo. Ata o 20 de xullo recibiranse as propostas. Despois tramitaranse.