O Novás, que suma seis derrotas por un gol en finais apertados, recorre a un profesional para reverter a situación
22 mares 2019 . Actualizado ás 05:00 h.O Atlético Novás acumula 15 derrotas no seu regreso á División de Prata do balonmán español, e delas seis foron por un gol, case sempre en partidos moi igualados cun final de cara ou cruz onde o equipo do Rosal, por norma, sae perdedor. Para cambiar a dinámica a escuadra traballa desde fai tres semanas co psicólogo Rubén Bravo co obxectivo de reverter a situación agora que a tempada entra na súa recta final. De momento, foron capaces de gañar ao Santoña na súa primeira semana pero a continuación encadearon dúas derrotas máis (por dúas e un gol respectivamente).
«Con tantas derrotas pola mínima constrúese unha serie de crenzas sobre os últimos minutos, os minutos crave, onde resulta complicado a nivel mental atopar éxito. Basicamente ao que dedicamos estas tres semanas foi a traballar sobre eses conceptos e algunhas veces con mellores ou peores resultados», comenta Rubén, que traballa un día por semana no plano colectivo e logo ten charlas individuais con xogadores (habitualmente o día antes ou a mañá do partido), o capitán e o adestrador. Con Ismael Martínez case a diario. «Falamos durante a semana, e traballamos as frases que se lle dan ao equipo, a nivel mental que é o que se toca en cada adestramento, que é o que se pode tocar na charla prepartido, a planificación a nivel psicolóxico dos xogadores e a mensaxe que teñen que recibir», precisa.
A estas alturas, non parece casualidade que sempre saia cruz nos partidos apertados: «Pasou unas cantas veces, especialmente fóra de casa, pero non é algo fortuíto. En cada partido hai condicionantes que pesan máis, pero se que é certo que é unha tempada complicada onde o peso psicolóxico a estas alturas é moi importante».
No mundo do balonmán hai un precedente esperanzador con Joaquín Dosil o curso pasado en Cangas, aínda que Rubén Bravo precisa que «son situacións similares en canto a clasificación e demais, pero cada equipo é un mundo e un contexto completamente diferente que fai que a intervención sexa en si diferente, pero se é certo que do que se trata é como naquel caso co Cangas, dun equipo que ten un sistema de crenzas que xa implica que a nivel inconsciente veñan moitos pensamentos de que nos somos capaces e instaurar un pensamento de todo o equipo, único, que vai dirixir cara ao que queremos conseguir. Hai que focalizar moito no proceso, no rendemento e deixar un pouco de lado o resultados».
Polo momento percibe melloría máis aló dos resultados: «A primeira semana que traballamos enfrontámonos a Santoña xogouse ben e gañouse ben, a segunda con Antequera acabamos perdendo dun gol pero houbo bo xogo e non foron tanto os minutos finais e o sábado contra Aranda marcounos moito o inicio do partido. Eu creo que hai melloría no equipo con iso pero no balonmán hai infinidade de factores que inflúen sobre o resultado», pero polo menos queren ter controlados os que dependen deles. Comezando pola mente.