Un de cada dez clientes que ten a empresa na Coruña procede de Vigo
23 ene 2019 . Actualizado ás 00:00 h.A multinacional Ikea confirmou o seu interese por Vigo onde abriu unha tenda de deseño no Centro Comercial Gran Vía. A directora de Ikea Coruña, Irantxu Díaz, sinalou no acto de apertura que «Vigo é unha mercado interesante e estamos a explorar novas oportunidades». Segundo confirmou a directora do centro coruñés, un de cada dez clientes que teñen na cidade herculina procede de Vigo polo que as expectativas son altas. O novo centro da empresa sueca espera fai fronte a unha cifra de 30-40 pedidos á semana. A tenda de Ikea Deseño atópase situada na primeira planta e dará emprego a cinco persoas. Neste córner de 17 metros cadrados poderase deseñar, planificar e encargar calquera conxunto de decoración ou moble, xa sexa para unha vivenda particular ou para un negocio. Os interioristas da firma sueca proporcionarán todo o asesoramento preciso. Ademais poderanse comprar todos os produtos que Ikea vende nos seus almacéns. A empresa sueca xa conta cun centro de distribución en Mos onde se reciben as mercancías que os habitantes da área metropolitana encargan. Pero os compradores teñen que ir recollelas. No caso do novo centro do Centro Comercial Gran Vía, os repartidores poderán levar a casa os mobles por 49 euros, cunha rebaixa de vinte euros sobre o prezo habitual. Esta oferta manterase «durante os primeiros meses», sinalou Díaz.
A inauguración da tenda correu a cargo do alcalde de Vigo, Abel Caballero, que encomiou á multinacional e reiterou o seu interese para que «Ikea abra unha gran tenda en Vigo». «Queremos que abra pronto, pero iso non depende sólo de min. A que se abriu neste centro comercial é un punto de ancoraxe», asegurou Caballero. A directora da empresa na Coruña non confirmou se neste momento están a negociar terreos na cidade ou en municipios próximos como Mos. Alí a Zona Franca dispón de espazo no poligono Porto do Molle. O ente que dirixe David Regades tamén ten previsto ampliar o polígono industrial de Valladares, que tamén sería unha opción que podería interesar á compaña.
Antes de que Ikea se establecese na Coruña o centro da empresa no Porto atraía a unha gran cantidade de compradores.«De feito a fin de semana falabamos todo o tempo en castelán», confirmou un traballador que estivo destinado no Porto, logo na Coruña e agora prestará asesoramento aos clientes de Vigo no Centro Comercial Gran Vía.
No corte da cinta da inauguración tamén estivo o director do centro comercial, Francisco Pinto, que tamén mereceu os parabéns do alcalde polo que supón de«gran espazo de lecer, de compras e para pasear»