O xuízo polo contrato nunha concesionaria do Concello empeza mañá
22 ene 2019 . Actualizado ás 12:47 h.O funcionario Francisco Gutiérrez Orúe enfróntase a unha pena de oito anos de cárcere, 30 de inhabilitación e 10.950 euros de multa polo enchufe de Vanesa Falque, a cuñada da tenente de alcalde de Vigo e presidenta da Deputación de Pontevedra, Carmela Silva. Está previsto que o xuízo se celebre mañá e pasado na Quinta Sección da Audiencia Provincial, con sede en Vigo. No proceso tamén está acusado o xerente da empresa que contratou a Falque, Imesapi, Ramón Comesaña, para o que o fiscal pide sete anos de cárcere, 20 de inhabilitación e a mesma multa. O Ministerio Público require que ambos devolvan ao Concello de Vigo os 108.147 euros que Imesapi cobrou para, supostamente, pagar á cuñada de Silva. Se eles non pagan, terá que facelo a empresa.
O fiscal non ten dúbidas sobre que Orúe e Comesaña idearon un plan para contratar a unha «muller moi afín a un membro do goberno local», tal e como se refire á cuñada de Carmela Silva no seu escrito de acusación. Ese plan pretendía dar un traballo a Vanesa Falque vulnerando «os principios de libre concorrencia, transparencia e publicidade», di o fiscal. A empresa xestionaba a atención ao público e conserjería nos centros cívicos que dependían da concellaría de Participación Cidadá, na que Orúe, militante do PSOE, era xefe de servizo baixo o mando do concelleiro Santos Héctor Rodríguez, que foi secretario provincial dese partido.
A cuñada da presidenta da Deputación estivo en nómina de Imesapi entre xuño do 2008 e xullo do 2013. Formou parte do persoal desa empresa a pesar de que, segundo o fiscal, «non se necesitaba máis persoal nos centros cívicos. Sempre segundo o relato da acusación pública, Vanesa Falque recibía ordes de Orúe, que lle encargou realizar enquisas sobre a calidade dos servizos municipais. As nóminas elaborábanse «de forma mendaz en canto a cantidades e conceptos». O plan que o fiscal di que tramaron os dous acusados consistía en que o Concello adxudicaba contratos menores á empresa para que esta destinase o diñeiro a pagar a nómina de Falque.
Cos contratos menores evitábanse os procesos de contratación con publicidade. Eran «facturas sempre inferiores a 18.000 euros para evitar a adxudicación do servizo mediante outro tipo de procedemento sometido aos principios de concorrencia, publicidade, competitividade e mellor prezo», di o escrito de acusación.
A base deses contratos menores, o Concello pagou a Imesapi un total de 108.147,22 euros, máis o IVE. Foron nove contratos menores.
Segundo o fiscal, todo iso fai que Gutiérrez Orúe mereza ser condenado por tres delitos: prevaricación continuada, malversación e falsidade documental. Ramón Comesaña está acusado de cooperador necesario na malversación e tamén de autor na falsidade documental.
Na causa chegaron a estar investigados Santos Héctor Rodríguez e Vanesa Falque. Ambos foron liberados de responsabilidade penal. No caso do concelleiro, non quedou acreditado que el ordenase contratar á irmá do marido de Silva. No caso desta, porque os feitos, de ser certos, prescribiron.