Os de Manuel Pablo enfróntanse aos murcianos este domingo ás 19.00 horas; o Dépor xa puxo á venda as entradas
07 may 2025 . Actualizado á 19:21 h.Riazor será o encargado de albergar o partido de ida do play off de ascenso a Primeira Federación do Fabril. Así o fixo oficial o Dépor. O filial medirase ao UCAM Murcia o vindeiro domingo 11 de maio a partir das 19.00 horas e, para o transcendental encontro, o club decidiu abrir as portas do estadio. Ademais, o duelo poderase seguir en directo a través da canle de Youtube do Dépor.
Tras anunciar o novo escenario, no canto da cidade deportiva de Abegondo, onde xoga normalmente o equipo de Manuel Pablo, o club puxo ao dispor dos afeccionados as entradas, que será gratuítas e obrigatorias para os socios. Estes poderán retirar a súa invitación e outra a maiores —en principio para a zona de Tribuna Inferior— a través da páxina web do Dépor, bancada.rcdeportivo.es. Igualmente habilitouse de forma simultánea o sistema de venda de entradas para o público en xeral, a través da mesma plataforma. O prezo de cada entrada para seguidores sen carné é de 10 euros.
O 18, quenda para o Xuvenil A
Pola súa banda, o Xuvenil A coñeceu a data e hora do seu partido de ida dos cuartos de final da Copa de Campións. Os de Miguel Figueira mediranse ao Tenerife o sábado 10 (13.00 horas, Youtube RCDeportivo). A volta xogará en Riazor o 18 de maio ás 12.00 horas.