O Dépor logra ante o Mirandés a súa quinta «manita» como visitante nos últimos 25 anos

Este sábado houbo choiva de goles en Mendizorroza. O Deportivo endosou cinto ao Mirandés grazas ao dobrete de Luismi Cruz e ao triplete de Zaka Eddahchouri. Con este 1-5 o conxunto branquiazul acadou a súa quinta «manita» lonxe de Riazor nos últimos 25 anos.

Non hai que remontarse moito no tempo para atopar a última vez que o Dépor anotou cinco tantos como visitante. Foi a tempada pasada. E por partida dobre. Primeiro tocoulle ao Albacete, ao que se mediu o  27 de setembro da 24-25. O partido finalizou 2-5 grazas aos dobretes de Mella e Yeremay e o tanto de Cristian Herrera.

Apenas un mes máis tarde, o 2 de novembro, o cadro coruñés repetiu goleada. Fíxoo ante o Cartaxena (1-5). De novo o extremo canario anotou un dobrete e culminaron o partido Ximo Navarro, Barbeiro e Herrera.

Aínda en Primeira Federación, o Dépor impúxose ao SD Logroñés nAs Gaunas. Foi un amplo 0-5 obra dos tantos de Lucas Pérez (marcou dous), Mella, Barbeiro e Alcaina. Era a tempada 2023-2024. E, ata a 2003-2004 non se volveu a ver un resultado tan avultado fóra de casa. Foi precisamente ante o Celta. O tres de xaneiro do 2004 o cadro coruñés asaltou Balaídos cun triplete de Víctor e senllos tantos de Luque e Diego Tristán.

Entre o 0-5 de Balaídos e a goleada nAs Gaunas, o Deportivo só puidera gañar fóra de casa por 0-4 e foi en dúas ocasións: en Primeira División o 13 de abril do 2013 fronte ao Levante (Valerón, Pizzi, Nelson Oliveira e Bruno Gama); e o 21 de maio do 2022 fronte ao Valladolid Promesas (dobrete de Miku, Quiles e Álvaro Rey).

Moito máis hai que remontarse para localizar unha goleada maior fose de casa. Máis concretamente hai que trasladarse ata a 1995-1996 e ao estadio de Vallecas. Alí o conxunto coruñés impúxose ao Raio por 0-6. Era a época dos Donato e Bebeto. Ambos os xogadores anotaron un gol cada un e completaron a goleada Aldana, Alfredo, Manjarín e López Rekarte. Desde entón, o Dépor xamais logrou nada igual.

---

---

---